فن ومنوعات

«أوس أوس»: لن أسمح بالتدخل في حياتي الشخصية

 

أعرب الفنان الشاب ونجم مسرح مصر محمد أسامه الشهير بـ”أوس أوس” عن غضبه الشديد من الهجوم الذي شنه رواد مواقع التواصل على زوجته لحضورها فرح شقيقة زميله مصطفى خاطر بملابس سوداء وظهور ملامح الحزن على وجهها.

ووجه “أوس أوس” إلى منتقديه رسالة شديدة اللهجة عبر حسابه الشخصي على موقع الصور الشهير “إنستجرام”:”يعنى ناس مريضه وقليله الادب بتكتب كومنتات وقولنا ماشى يمكن واحد غير مسئول وغير مدرك وعنده ما يكفيه من امراض للحقد والغل على اى حاجه وبنستحمل !! انما يعنى لما يكون فى موقع محترم (على ما اظن )اسمه الدستور ! بيعمل شير لكومنتات الناس المريضه دى وبينزلهم خبر كمان ! ده يبقى اسمه ايه ؟! مش هقول غير حسبى الله ونعم الوكيل فى كل واحد مش بيراعى ربنا فى مهنته ..وبطلب من كل الصحفيين المحترمين عدم نشر اى خبر يخص حياتى الشخصية لو سمحت كفايه اوى اللى الواحد فيه … وشكرا موقع الدستور على التشهير بالعقليات المرضيه لكسب ليكات وفولوهات مبروك عليكم “.

وتابع:” انا مش محتاج ابرر وأحكى اى حاجه عن حياتى والست اللى قلبى اخترها كنت ساعتها فى اول موسم لتياترو مصر كنا نتقاضى مرتبات مش ممكن تفتح بيت واول ما اتجوزت كنت اقعد فى بيت ايجار كمان انا بس هكتفى بالنقطتين دول علشان اصحاب العقول والنفوس المريضه يعرفوا ويبطلوا نغمه (الفلوس بتعمل اكتر من كده ) الفلوس ممكن تشترى سرير بس ماتشتريش النوم ! ومش انا بس دا اغلب المشاهير اللى بتحسدوهم على حياتهم دلوقتى ماتعرفش بدا من امتى واتبهدل ازاى ولولا وجود حد جنبه بيسنده ويدعمه ماكنش هيعرف يعدى من اى مشكله نفسيه او ماديه فى حياته.. ومش معنى انى بنزل اشتغل او بتصور وانا مبسوط ده معناه انى هموت من الفرحه بس دى مهنتى واجبى ناحيه جمهورى انى اخرجه من اى حزن هو فيه كل ده بعمله على حساب حزنى وجرحى ووجعى انا ..وفى الاخر بتشتم برضه “.

واختتم قائلا:”انا بقول الكلام ده ولن اسمح باى تدخل فى حياتى الشخصيه مره اخرى سواء بالخير او بالشر او دخول اسم مراتى فى اى كلمه من كلام المرضى النفسيين ..مراتى اللى اخوها متوفى و ابنها متوفى وماصدقت اول مره اخرجها نروح مناسبه ودمرتوها نفسيا تانى بكلامكم المريض..حسبى الله ونعم الوكيل فيكم.. حقك عليا ياست الكل  سكت كتير وكنت بعدى لكن مفيش فايده.. كل واحد يركز فى حياته.. الطموح حلم مشروع عند كل الناس اسعى واتعب وكافح وربنا اللى بيكافئ مش البشر بدل ماتفضل تبُص فى حياه الناس “.

يذكر أن أخر أعماله هي مسرحية “صباحية مباركة” وهي من تأليف أحمد عبد الوهاب وكريم سامي، وإنتاج شركة وورك شوب للإنتاج الفني، وإخراج أشرف عبد الباقي، وديكور دكتور محمود سامي، وأشعار أيمن بهجت قمر وبطولة  علي ربيع،  سليمان عيد، وطاهر أبوليلة، وحسام داغر، وأحمد سلطان، ونيفين التوني، وملك ياسر، ونيللي محمود، ومحمد مغاوري، ومحمد منصور، وجابر فراج، وهاني فاروق، وضحي نصر الدين، وآلاء علي، ونيرة عارف، وصميدة.

 

 

 

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى