جهاد علي
دافع وائل رياض نجم النادي الأهلي السابق، عن الفنان يوسف الشريف بعد الانتقادات التي وجهت له بسبب تصريحاته عن رفض المشاهد الساخنة.
وعلق «وائل«، عبر حسابه الشخصى على موقع التواصل الاجتماعي «فيس بوك»، قائلًا: «والله حصل: زمان وأنا ساكن في مدينة نصر كانت بتربطني صداقة قوية أوي بيوسف الشريف، المهم كنا بنتمرن سوا في الچيم ومرة واحدة وإحنا بنتمرن أذان العصر أذن راح قاطع التمرين وقالي تعالي نصلي قولتله يا بني ماهو لسه بدري ولما نخلص تمرين هيبقي في وقت كبير فاضل علي المغرب يعني مفيش مشاكل».
تابع موضحًا: «المهم قالي (لا خير في عمل يلهي عن الصلاة) وفعلا روحنا نصلي ومن ساعتها والموضوع ده مش بيروح من دماغي، ليه بقول كده دلوقتي علشان عايز أقول إن يوسف الشريف محترم وخلوق من زمان أوي مش وليد الصدفة، رأيه لازم يُحترم حتى لو انت مش مقتنع بيه، بالتوفيق يا يوسف واستمر».
والجدير بالذكر، ان الفنان يوسف الشريف قد صرح في برنامج “مساء dmc”، قائلا: «في قيود أنا بحطها لنفسي زيادة عن أي حد تاني، ودي حقيقة حتى لو وصلت لدرجة العقود.. دي حقيقة بقالها 10 سنين أو أكتر، ده من بعد فيلم هي فوضى، بدأت أفكر بالطريقة دي.. دي حرية شخصية طالما مبضرش حد.. أنا مبستريحش لو بقي فيه مشاهد ساخنة أو فيها قبلات.. دي قاعدة بطبقها على نفسي بس.. بدأت أحط قيود لأن قبل كده في منتجين اتفقت معاهم على ده ووقت التنفيذ غيروا كلامهم».
تابع: «وهنا أنا لا أزايد على زملائي أو إني أحسن منهم، بالعكس كلهم ليهم الاحترام ومنهم من يقدمون أعمالا محترمة دون أن يتعمدوا هذه الطريقة.. عشان بس الكلام ميتفهمش إني بزايد عليهم أو بقول إني أحسن منهم.. خالص».
