الشاعر/ احمد الصارم
حبي ليكِ
حب عمره بعمر آدم
لما كان ع الأرض هايم….جنبه حوا
لسه بيضا صفحته
لسه بتنبت مشاعره…لسه بيلملم ف نفسه…حبة حبة
لسه بيرتب ف صورتك جوا منه….وسط ملايين الصور
إنتِ أول واحدة شافها رغم إنه…..قبل منك شاف بشر
هو حاسس ناحيتك بشعور غريب
نفسه يتكلم معاكي….تكلميه
لما يندهلك….قبل مايكمل بإسمك تبقي إنتِ بتندهيه
بس مش عارف يعبر….أصله عمره ماحب حبك
وإنتِ بتداري ف مشاعرك
ما إنتِ برضه صفحة بيضا جوا أنثي
لسه مش مكتوب عليها….اي فتحة واي كسرة…..!!
لسه ف بينكوا الخجل…اللي هو
لما عيني تلمس الفستان عليكي….ابقي ضعت ف شبر ماية
فين عنيكي….بتداريهم عن عنيا
وابقي خايف تبعدي
يتكرر المشهد كتير….إنتِ عايزه وقلبي عايز
بس إمتي الخطوة ديا…..!!
لسه حب بيتولد
بين مشاعر بنت هادية….وانفجار جوا الولد
بس مولود قيصري
حد يرمي ضناه يا ناس….!!
مستحيل هاقدر عليها….وإنتِ مهما هربتي برضه مستحيل هتقدري
