فن ومنوعات

رشا مهدي تعلن دعمها للفنان عبد الرحمن أبو زهرة بموقف طريف

هاجر عاطف

أعلنت الفنانة رشا المهدي عن دعمها الكامل للفنان القدير عبد الرحمن أبو زهرة في أزمته الأخيرة قائلة : “طول عمرك قامة و قيمة ومبتبخلش على حد بخبرتك و فنك”.

وأضافت من خلال نشرها لموقف كوميدي تعرضت له مع الفنان أبو زهرة عبر حسابها الشخصي على موقع التواصل الاجتماعي “فيسبوك” قائلة:”بمناسبة الكلام عن علاقة عمنا الأستاذ عبد الرحمن أبو زهرة بالممثلات و النجمات في اللوكيشن و إن محدش “سلم من لسانه”.. أنا اشتغلت مع الأستاذ كذا عمل آخرهم مسلسل أستاذ و رئيس قسم مع الزعيم و مشفتش من أستاذ عبدالرحمن غير كل خير طبعا، بس آخر عمل ده بصراحة “مسلمتش من لسانه” و هحكي ايه اللي حصل”.

وتابعت:” أول يوم تصوير شفته وكنا من سنين متقابلناش فسلمت عليه و قام ربنا يديله الصحة و سلم عليا بس كان بسرعه أوي ورجع قعد تاني! بصراحة اتفاجئت و خفت يكون زعلان مني فبعد ما سلمت عالناس رجعتله و قعدت جمبه و فضل ساكت فقلقت اكتر وقلتله حضرتك فاكرني؟ فمن غير ما يبصلي قالي آه فاكرك! “.

واستكملت:”بصراحة استغربت اكتر من طريقة المعاملة و فضل ساكت فقلتله طب فاكر اشتغلنا إيه مع بعض؟ قالي آه و سكت برضو! بصراحة الموضوع استفزني اكتر فقلتله طب أنا اسمي ايه؟ وهنا انفجر فيا وقالي بصوت عالي “رشا مهدي فاكرك يابنتي والله فاكرك واشتغلنا كذا و كذا و كذا ولو انتي بقى فاكره كنت بقول سيبوني أركز قبل التصوير عشان اعرف اشتغل وانتي كمان قومي ذاكري و نبقى نتساير بعد الشغل يا بنتي.”

وقالت:” أنا طبعا مقدرتش امسك نفسي و ضحكت وهوا بيزعق و اللوكيشن كله ضحك وهوا حبيبي ممسكش نفسه و ضحك و طبطب عليا وقالي يا بنتي كنت مركز متزعليش مني و قعد يسأل على ماما واخواتي و عليا ويقولي رأيه في شغلي و بعدها قمنا نحضر.فجأة الزعيم راح للأستاذ عبد الرحمن وهو مركز تاني وقرب منه وقاله بصوت عالي “أنت فاكرني”؟”.

واختتمت قائلة:”طبعا مش محتاجة أكمل افيه انت فاكرني ده كان عامل إيه في اللوكيشن طول التصوير..عمنا عبدالرحمن حضرتك نجم و فنان وأب من الزمن الجميل ربنا يديك الصحة طول عمرك قامة وقيمة ومبتبخلش على حد بخبرتك وفنك..انت فاكرني طيب؟”.

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى