علقت الإعلامية لميس الحديدي على فوز نادي الزمالك بالدوري المصري هذا العام قائلة : “طيب الزمالك أخد الدوري السنة دي.. ألف مبروك و ماله ، بالعكس المنافسة كويسه و تحفزنا و تخلينا كده نحس إن فيه منافسه أخيرا، بقي لنا سنين بتاخد البطولة بلا منافسه حقيقية. “
وأشادت بأداء نادي الزمالك قائلة : ” لكن للموضوعية يعني و كلمه حق برضه الزمالك لاعبيه اجتهدوا في ظروف صعبه و قدروا يحققوا البطولة بعد غياب طوبل ، أنا ست بأحب المنافسة عموما لأنها تحسن الأداء و تشجع الجميع، خاصة أن الكوره في مصر يعني مش في أعظم حالاتها ، مش شايفين صلاح و رونالدو و ميسي يعني .
لكن عادت وقالت عبر برنامجها ” كلمة أخيرة ” المذاع على شاشة ” ON”قائلة : اللي عاوزه بس اعلق عليه هنا هو ليه لما فريق يكسب جمهوره يهاجم الفريق التاني، طب الزمالك اخد الدوري و احتفالات عظيمه كأنه أخد كاس العالم ماشي ، ليه بقي الهجوم ، ليه الألفاظ ، ليه ؟ احتفل بنفسك ، مالك ومال الآخرين ؟ “
ووجهت الحديدي رسالة للإعلامي إبراهيم عيسى بعد الجدل الذي أثاره خلال الساعات الماضية بعد وصفه لشعار النادي الأهلي ” الأهلي فوق الجميع ” بالشعار النازي قائلة : ” صديقي إبراهيم عيسي قال إن جمله الأهلي فوق الجميع ده شعار نازي ، يا صديقي الزملكاوي العزيز أنت عارف طبعا إنها جملة قالها صالح سليم في وقت انتخابات لوقف التناحر بين المرشحين قالهم الأهلي و مصلحته فوقكم كلكم ، فوق الأهداف الفردية ،فوق المصالح الشخصية، وإحنا كأهلاوييه مؤمنين بهذا الشعار ، ده دستورنا اللي بنحترمه، دي مبادئ الأهلي و قيمه اللي مش بنتنازل عنها و لا علاقة لهذا الشعار أبدا بالنوادي الأخرى . إحنا بنتكلم عن أنفسنا.الكيان عندنا فوق الجميع و فيه أمثلة كتيرة جدا لذلك. الأهلي فوق الجميع”.
وواصلت : “علشان كده واخدين ٢٦ بطوله دولية، آخرهم ١٠ مرات بطوله أفريقيا ، ١١٢ بطوله محليه منهم ٤٢ مره بطوله الدوري ، نادي القرن يا جماعه عن حق. مش ناقصين بطولات ، و لكن لازم برضه نركز و نعمل صفقات أفضل و نحسن الأداء و نزود المهاجمين ، ده في إطار التحسين فقط. لكننا ندعم دايما فريقنا و نسانده”.
