نعى الإعلامي أحمد يونس، وفاة والدته، بكلمات مؤثرة، وذلك عبر صفحته الشخصية على موقع التواصل الإجتماعي «فيس بوك».
ونشر أحمد يونس عدة صور تجمعه بوالدته، وعلق عليها: «جزاكم الله كل خير لدعواتكم لأمي في ساعاتها الاخيره ودعواتكم لها بعد وفاتهاىوتعازيكم اللي وصلتني كتر الف خيركم ادعو الله ان يحفظ لكم ابائكم وامهاتكم ويرحم من مات منهم مع السلامه يا امي مشيتي بعد صراع مع الكبد وامراضه اللعينه مصطفى ابن اختي باقل من شهر وان شاء الله كلكم مع بعض دلوقتي».
وأضاف: «يا من كنت ولازلت سبب في كل خير انا فيه هفتقد دعوتك ليا المعتاده “ربنا يخبب فيك خلقه” هفتقد ملمس ايديك الضعيفه الحنينه وهي بتطبط على كتفي بعد ما ببوسها وانا في قمة سعادتي هفتقد حضنك الحنين ونومي على رجليكي وهزارك معايا وتشجيعك ليا ودعمك الدايم هفتقد قعدتنا كل حد بالليل واحنا سهرانين بنتفرج على برنامجي وببص لك وبشوف نظرات الفخر في عينيكي وبعد ما الحلقه تخلص تبصي لي وتقوليلي هايله هايله هفتقد قعدتك قبل رمضان وقبل العيد الكبير وانت بتكتبي قايمة اسامي لازم نبرها ونودها».
وتابع: «فقدتك وفقدت كل معاني الحياه لكل من ترى عينيه هذا الكلام الزموا رجلين امهاتكم عادي نختلف ونزعل ونتصالح بس اوعوا اي حاجه تخليك تقاطعهم او تاخد موقف منهم انا فات على موت امي يوم حاسس انه ماشي ببطء رهيب انهارده انا عرفت معنى ماتت التي كنا نكرمك لاجلها مع السلامه يا امي».
