حذر الشاعر الغنائي أمير طعيمة، جماهير كرة القدم من التعصب الكروي، وذلك عبر صفحته الشخصية على موقع التواصل الإجتماعي «فيس بوك».
وكتب أمير طعيمة في منشور له: «الهزار و الألش الزيادة و التعصب و تجاوزات الاعلام بعد كل مباراة حول بطولة الدوري لساحة معركة، و حتي بعد الكورونا اعتقد اننا هنفضل نلعب بدون جمهور لأمد طويل عشان بالوضع ده هتحصل كوارث، الهدف الأسمى لبطولة الدوري انك تفرز لاعبين للمنتخب، و انت عندك ٣ فرق (الاهلي و الزمالك و بيراميدز) فيهم اكتر من ٢٠ لاعب دولي ده غير اللي بتفرزه باقي الفرق و المنتخب الاوليمبي و المحترفي».
وأضاف: «لاول مرة من ساعة منتخب حسن شحاته هيبقي عندك منتخب قوي و كمان دكة قوية، تخيل ان في السردباكات مثلا هيبقي فيه ٢ من الونش و حجازي و ايمن اشرف و محمود علاء علي الدكة، و في الوسط المدافع واحد من النني و طارق و السولية هيكون علي الدكة و في الوسط المهاجم واحد من عبد الله السعيد هداف الدوري و قفشة اللي طالع اسرع من الصاروخ ع الدكة، و نفس الامر بالنسبة لرمضان و تريزيجيه ده غير زيزو اللي حظه انه بيلعب في مركز صلاح، و الشناوي و ابو جبل اللي كل واحد فيهم يشيل منتخب لوحده، و مجموعة كبيرة اخرى، يعني عندك دكة اقوي من الاساسي في منتخبات كبيرة في القارة».
وتابع: «مصر عندها فرصة تتسيد أفريقيا من جديد و الدليل ان نهائي دوري الابطال كان مصري خالص لاول مرة في تاريخ افريقيا، و حقك المشروع طبعا تبقي عايز ناديك يفوز بكل البطولات بس ده لا يتعارض مع احترامك للخصم».
واختتم: «حافظوا علي كل لاعبي مصر و افتكروا ماتش مصر و الكونجو اللي وصلنا كاس العالم اللي كنّا حابسين نفسنا و مَش فارق معانا مين اللي هيجيب هدف الصعود، شجع ناديك بكل طاقتك من غير ما تكره الاندية الاخرى، دي بطولة بتلعب في دولة واحدة و خصمك منافس مَش عدو».
