شن الشاعر الغنائي تامر حسين، هجوما على مطرب المهرجانات حسن شاكوش بعد لقاءه مع الإعلامي عمرو أديب على قناة ام بي سي مصر، عقب إعلان الفنان هاني شاكر قرار استقالته من منصبه نقيبا للمهن الموسيقية.
وكتب تامر حسين، عبر حسابه على فيسبوك :”الحقيقة مُستفز جداً كلام مطرب المهرجانات حسن شاكوش، تصريحاته فى برنامج الأستاذ عمرو أديب غير موفقة تماماً”.
وتابع :”من الناحية الأدبية وذوقيات المهنه والجهل بالمعلومة والتدليس، اللى بيعمله للمُشاهِد اللى مايعرفش حقيقة لحن بنت الجيران، اللى مِن الحان ملحن شاب مصرى (مدين )، الراجل تم التعاقد معاه، رسمياً من شركة تركيا بُمُقابل مالي نظير إستخدام لحن (حاجة مِستخبيه) اللى خلاك شئن وشهرك وكان سبب رزق ليك عيب، تِنكر الحقيقة وتضلل الجمهور اللى يجهل بالمعلومة، الراجل ماسرقش لحن حاجه مستخبيه ده من إبداعه، وده تعدي على حقه الأدبى وممكن يقاضيك وياخُد تعويض على إساءتك وجهلك بالمعلومة”.
واستكمل :” ثانياً .. شتان الفرق الشاسع بينك وبين نجم كبير زى محمد حماقى فنياً وأدبياً وثقافياً وذوقياً من حيث المحتوى والمضمون، وسيبك من الزمن اللى إحنا فيه وتدني الذوق العام وإعلانات اليوتيوب الممولة اللى خليتك تطلع تقول اغنية محمد حماقى جايبه ١٦ مليون مُشاهدة … وكأنك مايكل جاكسون
هتعدى السنين وهتشوف اللى حايعيش حاجه مِستخبيه والا أغنيتك اللى لولا نجاح أغنية محمد حماقى وتوصيلها ل أكبر قدر من الجمهور مكنتش اغنيتك إتشهرت ع الجاهز الراجلِ ساهم فى نجاحها فا ذوقياً تشكره وتتكلم ب أسلوب أرقى مِن كده.. على ناس كانوا سبب فى نجاح ورزق ليك وماحدش جّرح فيك، كُلهم دعموكم عشان تاكلوا عيش وتنجحوا وأهاليكم وحبايبكم، يفرحوا بيكم والراجل أقدم مِنك وأشهر مِنك يبقى تقدره وتتكلم بشكل مُنصف”.
وأضاف :” ثالثاً .. صُناع الأغنية المُبدعين المُبتكرين الشاعر المبدع محمد عاطف والملحن المُبدع صاحب اللحن الأصلي اللى إتاخد فى تركيا للنشر بُمقابل مالي والموزع الكبير أحمد إبراهيم.. دول ناس يستحقوا الشُكر فى العلن مش تشوية وتقليل، من شأن أغنيتهم اللى نجحت جداً ف سنة نزولها وكانت أنجح أغانى السنه وأتمنى من الإعلام والسادة المسؤلين عن إختيار الضيف يصدروا للمُجتمع حاجات وطاقات حلوة مُبهجه مُستنيرة وعندها قدر من الوعى والإحترام والتقدير والذوقيات بلاش إحباط الله يخليكم مش حايبقى كرة وفن حافظوا على ما تبقىّ”.
