التوكتوك اصبح الان موجود في كل شارع بكل المحافظات فهو وسيلة نقل الكثيرين يركب فيه الاطفال للذهاب الى مدارسهم فهو يخفف عنهم حمل الحقائب الثقيلة وايضا ربة المنزل اثناء رجوعها من التسوق فهو يوفر عليها حمل اشيائها والمشي به مسافات طويلة وكبار السن يقصر عليهم المسافات ،ومن عيوبه الخطيرة انتشار عمليات السرقه والخطف فيه وقيادته من الاطفال مما يسبب الكثير من الحوادث وانتشار البلطجه ، وبعد أن أصدرت وزارة التجارة والصناعة قرار رقم 533 لسنة 2021 والخاص بوقف استيراد المكونات الأساسية للمركبات ذات الثلاث عجلات “التوك توك”، وتشمل القاعدة والشاسيه والمحرك، ويأتى هذا القرار فى إطار تنفيذ خطة الدولة الهادفة إلى تطوير منظومة وسائل النقل وإتاحة مركبات آمنة للحفاظ على سلامة المواطنين، وهذا القرار جاء بعد دراسة متأنية من كافة الأجهزة المعنية ويستهدف إحلال التوك توك بوسيلة نقل آمنة وذلك تنفيذاً للمبادرة الرئاسية الخاصة بإحلال المركبات للعمل بالطاقة النظيفة وبصفة خاصة ” الغاز الطبيعى”، حيث تستهدف الحكومة إتاحة سيارات “ميني ڤان” كبديل عن التوك توك.
توجهت محررة “اليوم” الي احد اسواق بيع التوكتوك بالاسكندرية بعزبة محسن لرصد اراء التجار وسائقي التوكتوك والعاملين في تصليحه وبائعي قطع الغيار.
وبدأ الحديث الحاج “عطية الحداد” صاحب احد محلات بيع التوكتوك بالاسكندرية قائلا : قرار ايقاف استيراد التوكتوك وقطع الغيار هيأثر على الكل وتأثيره على المواطن اكثر من التاجر، المواطن الغلبان اللي معاه ١٠٠٠٠ الاف او ٢٠٠٠٠ الف يضعهم مقدم للتوكتوك ليصرف على بيته واولاده ، لكن التاجر لديه رأس مال يمكنه من التجارة في اي شئ اخر ، موضوع قطع الغيار هي المشكلة ، بما انه سيمنع التوكتوك وسيتم احلاله بسيارة والسيارة تعمل بالكهرباء فلابد من وجود محطات كهرباء علشان الناس تشحن ، حتى الان لم يصل لنا سعر السيارة الجديدة ،” المشكلة في المواطن الغلبان اللي اشترى توكتوك بالتقسيط ووقع على ايصالات هو عائلته على التوكتوك في حالة عدم توفر قطع غيار التوكتوك هيقف ومش هيعرف يسد القسط لانه على مدار عدة سنوات قطع الغيار الموجودة عند التجار هتخلص ، ولا الوكيل ولا الموزع ولا غبور مستورد التوكتوك هيضرهم القرار”.
وقال “سيد شاهين” تاجر توكتوك : “قرار منع استيراد التوكتوك نزل من فترة ولم يتم تطبيقه والتوكتوك مصدر دخل المصري الفقير غالبية التوكتوك اللي في الشارع عليه ديون كبيرة جدا “ودي ناس بتجري على اكل عيشها” والمطلوب تقنين التوكتوك بالرخصة والتزام السائق برخصة قيادة وعمل رخص قيادة لسائقي التوكتوك ، منع استيراد التوكتوك هيوقف حالي وحال السائق وحال صاحب التوكتوك والميكانيكي ومحلات قطع الغيار وحال 5مليون توكتوك في مصر ونقول 5 بياكلوا من التوكتوك ، والسواق لو ما لاقاش قطع الغيار بتاع التوكتوك علشان يمشيه هيلجأ للبلطجة والمخدرات” .
وتناول اطراف الحديث “طارق محمود” صاحب محل توكتوك “ما عنديش مشكلة مع القرار انا سمعت في التليفزيون انهم حوالي 3 مليون توكتوك ازاي من 2003 الى 2021 لو كل سنة بتنزل مليون ماكينة في 28 محافظة يبقا عندك رقم لا يستهان بيه وهل هينزل بديل للتوكتوك وهل الاله اللي هتنزل مكانه هتحل مشكلة البلطجة ولا لو زي ما بنقول هما 4 مليون توكتوك هتخلق 8 مليون بلطجي لانه لما يكون واحد شغال ويتسحب منه الاله اللي شغال بيها هو هيشتغل ايه والمعمار واقف وما فيش اعمال حرفيه بتشتغل لازم البديل يقال هتنزل عربيات فان طيب العربيات الفان مش هيحصل بيها نفس مشاكل التوكتوك يجب تقنين الوضع، وتم عمل رخص وباسعار عالية وفي النهاية المرخص وغير المرخص بيتاخد يجب توفير البديل المصانع والشركات مثلا ازاي هتتمنع التكاتك من السوق طيب تم ايقاف قاعدة وشاسيه وموتور هيتصنعوا هنا ومن الباطن فمن رأيي يجب تقنين الوضع بدل ما تمنع الحاجة قننها ، فلماذا تم فتح التراخيص ودفع الغرامات والملفات والضريبة والدمغة والمؤسسة ، البيوت المفتوحة هتعيش ازاي والحرفيين اللي شغالين هتعيش ازاي والمصانع اللي مفتوحة هتقفل .
في توكتوك بيكون فاتح 3 بيوت بيت صاحب التوكتوك و2 سواقين، واذا تم توفير عربية مش هتكون بنفس ثمن التوكتوك هيكون عليه قسط وديون ونصف الناس مش هتلتزم وهتتحبس العيشة ضيقه على الناس التوكتوك مش ظاهرة ده امر واقع والناس دي فاتحة بيوت ومش هتقدر تدفع اقساط”.
وقال بعض سائقي التوكتوك ومنهم “يوسف الياس” سائق توكتوك
“اذا تم ايقاف استيراد قطع الغيار الناس الموجودة وبتشتغل على التوكتوك هتاكل عيش ازاي ، لذلك يجب توافر قطع الغيار فقرار منع الاستيراد سيزيد اسعار قطع الغيار اضعاف السعر الحالي ، احنا عندنا بيت واولاد والعربية الجديدة اللي نازلة ب90 الف جنية ، انا شغال على التوكتوك بقالي 4 سنين ، الناس من كتر الكلام على التوكتوك شايفين كل السواقين وحشين بس في ناس كتير كويسة بتاكل عيش منها ويمنعوا الاطفال من ركوب التوكتوك بسن قوانين صارمة”.
وقال “رجب محمد” سائق توكتوك “اعمل على التوكتوك منذ خمس سنوات وباكل منه عيش وفاتح بيتي منه ولو وقف التوكتوك هيقف حالي ، وهذه الفترة بحاول اشتري توكتوك لاخويا يشتغل عليه الاسعار وصلت الى 50 الف جنية، ومنع استيراد قطع الغيار هيرفع اسعارها ، اذا كان التوكتوك كان ب44 الف وصل الى 49 الف”.
اما “محمد عوض”فقال : ” بحاول اشتري توكتوك اكل منه عيش واصرف منه على بيتي واولادي والاسعار غاليه ، وعايز اجيب رزقي بالحلال ، عدم وجود قطع الغيار هيدفع الناس الى سرقة قطع الغيار من الماكينات الموجودة في الشارع ، البطالة هتزيد جدا لان كل البنائيين وبتوع المحاره والسباكة شغالين على التوكتوك، عند منع التوكتوك الناس اللي مالهاش شغل ولا عندها رأس مال هتروح فين وعندهم بيوت واولاد”.
وقال “اشرف” سائق توكتوك منذ 5 سنوات “انا كنت شغال حداد كريتال باب وشباك والحدادة واقفة فاضطريت انزل اشتغل على توكتوك علشان اصرف على عيالي فلما التوكتوك يقف انا هشتغل ايه بعد كده ، احنا مطلعين رخصة وبندفع المطلوب مننا يمنعوها ليه يسيبونا ناكل عيش”.
وتناول اطراف الحديث “بلال محمد” صاحب توكتوك قائلا : “انا خريج هندسة اليكترونيك ملاحة بحرية اشتغلت كهربائي سلسيون لاني لم يتم تعييني بشهادتي وما فيش شغل في الكهرباء جيبت توكتوك من 4 سنين انا مع القرار بس افتحلي مجال شغلي في ناس مش عارفة تجيب التوكتوك ده تشتغل عليه وتجيب رزقها عايز اي مجال اجيب منه رزقي بالحلال مثل المصانع او الشركات اي مكان”
اما العاملين في تصليح التوكتوك فقالوا وبدأ الحديث “السيد” سمكري توكتوك قائلا : اعمل سمكري توكتوك من حوالي 8 سنين “منع استيراد التوكتوك هيأذينا جدا وهيوقف حالنا ولقمة عيشنا معايا 8 شباب شغالين اكل عيشهم هيقف وشغل المعمار واقف وده مصدر حياتنا وتنفيذ القرار هيشردنا وناس كتير هتتجه للحرام”.
وتناول اطراف الحديث “احمد البرنس” ميكانيكي توكتوك قائلا : ” عندما يمنع استيراد التوكتوك احنا هناكل منين افتحوا لنا مجالات شغل تانية كنت شغال في المعمار ولما وقف اشتغلت في التوكتوك لو اتمنع باب رزقنا هنعمل ايه هنتجه للفلوس الحرام، انا خارج من السجن من فترة وبشتغل وبكسب رزقي في الحلال علشان اصرف على بيتي واولادي ومش عايز ارجع للخطأ فاشتغلت وسط الناس هنا ميكانيكي تكاتك وانا اساسا ميكانيكي سيارات بس الدنيا واقفة هاكل منين يجب توفير البديل” .
وقال “حسين مختار” صاحب توكتوك من 2006 “القرار حلو بس وفرولنا فرص عمل ما فيش معمار ولا في شغل واحنا عايزين نكسب رزقنا في الحلال”.
وقال “محمد حسن” موظف في محل قطع غيار توكتوك” احنا بنتعامل مع عدد كبير من سائقي التوكتوك نبيع قطع الغيار والكماليات حتى الان لم يصلنا رسميا هذا القرار ولو تم تنفيذه هيكون خراب بيوت الاسعار هتزيد لان كل قطع الغيار مستوردة من الصين والهند لانه ليس لدينا عامل الانتاج المحلي لو في مصانع في مصر هتصنع قطع الغيار هيكون امر جيد ونتمنى ان يكون في انتاج محلي للشاسيه والموتور وقطع الغيار”.
وقال العديد من المواطنين الذين رفضوا ذكر اسمائهم يجب تقنين وضع التوكتوك ومنع الاطفال من قيادته باصدار قوانين صارمة.
والسؤال الذي يطرح نفسه هنا هل سيتم توفير فرص عمل بعد منع استيراد التوكتوك لمن لا يملك ثمن البديل؟
