بالمستندات.. نكشف حقيقة المعاهد والأكاديميات المعتمدة في أسيوط وكيف تتاجر بعقول الأهالي وأحلام الطلبة
إسراء ثروت
مصير غامض ينتظر طلاب الفرقة الثانية بعد قرار الجامعة وقف التعاقدات الخارجية مع مراكز التدريب
ظهرت في الآونة الأخيرة مجموعة من الشركات التي تختبئ تحت ستار المعاهد المعتمدة من جامعة أسيوط، وهي في الحقيقة شركات تهدف إلى تحقيق الربح التجاري والاتجار بعقول الطلبة وأحلام الأهالي الغلابة الذين يطمحون في رؤية مستقبل أفضل لأبنائهم.
موقع “اليوم” الإخباري يكشف في التحقيق التالي فساد هذه الأماكن وحقيقة الشهادة التي يحصل عليها الطلاب وهل هي معتمدة من وزارة التربية والتعليم وحقيقة تصريح مزاولة المهنة الذي تقدمه للخريجين وهل تقوم هذه الأكاديميات بتاجيل التجنيد حقا أم أنها دعاية كاذبة؟
وقف التعاقدات مع مراكز التدريب
أعلن الدكتور طارق الجمال رئيس جامعة أسيوط عن صدور قرار من مجلس الجامعة فى جلسته الأخيرة المنعقدة يوم الخميس عن شهر سبتمبر بوقف التعاقدات الخارجية في مجال التدريب وذلك لمدة عام قابلة للتجديد، ومن المفترض أن يتم إغلاق هذه الشركات في نهاية العام المالي30/6/2022، ما يطرح تساؤلات عن طلاب الفرقة الأولي التي من المقرر أن يلتحقوا بالفرقة الثانية مع بداية العام الدراسي الجديد وكيف تتمكن هذه الشركات من استكمال الدراسة بعد وقف التعاقدات الخارجية مع الجامعة؟
محرر “اليوم” التقى عددا من العاملين في هذه الشركات ومسئولي الجامعة المختصين للتعرف على حقيقة القرار ومستقبل الطلاب بعد وقف الجامعة التعاقد مع هذه الأكاديميات.
أكاديمية الماسة
“وبالتواصل مع المسئولين في أكاديمية الماسة أكدوا أن الأكاديمية معهد سنتين وتمنح الطالب شهادة معتمدة من وزارة التربية والتعليم وتأجل التجنيد.
وأوضح المسئول أهمية الدراسة في الأكاديمية قائلا ” عندنا في المركز بنقدم فرصة للطلاب أنهم يحصلوا علي معهد سنتين و نظام الدراسة عندنا سنتين للطالب ولو طالب حابب يختصر الوقت بتكون الدراسة لمدة سنة مكثفة بس دا مجهود علي الطالب فبتالي الأفضل الدراسة تكون سنتين ومش بس كدة أحنا بنقدم بعد السنتين شهادة تخرج للطالب معتمدة من وزارة التربية والتعليم ومعتمده من الأكاديمية ويقدر الطالب من خلال الشهادة دي أنه يغير المسمي الوظيفي في البطاقة “.
واستكمل حديثه قائلا” عندنا نظام الدراسة في المعهد في أقسام مختلفة ومن بينها تمريض وتحاليل ودا بيشمل نظام دراسة نظري وعملي وإحنا الأكاديمية الوحيدة في أسيوط بنقدم دا وكمان الدراسة العملي الطلاب بيقدروا ياخدوا شهادة خبرة موثقة من المستشفي التي تم تدريب الطالب فيها وإحنا السنة الماضية كنا متعاقدين مع مستشفي الأمل والحكمة وكمان قسم التحاليل بنزل الطلاب في معامل يتم تدريبهم والطالب بياخد شهادة خبره مختومة من المعمل ومن الأكاديمية بعد ما يخلص الدراسة بياخد شهادة معتمدة من جهة حكومية زي بتاعت الثانوية العامة ويطلع كارنيه مزاولة مهنة والمصاريف عندنا بتختلف في قسم مصاريفه ٤٢٠٠ جنيه في السنة وفي قسم مصاريفه ٤٥٠٠ في السنة وطبعا في تأجيل التجنيد بمصاريف لوحدها تبلغ ١٧٠٠ جنيه “.
وأوضح المسؤل أهمية الدراسة في الأكاديمية وتميزها قائلا ” من ضمن الحاجات التي تميزنا في الأول كنا بنقبل من ثانوية عامة ودبلومات بعدين بقينا بنقبل من الإعدادية وياخد الطالب نفس الشهادات عادي وأحنا فاتحين باب التقديم مع التنسيق لغاية يوم ٢٠/٩ /٢٠٢١.”
أكاديمية الألسن
وقال المسئولون في أكاديمية الألسن إن ” نظام الدراسة سنتين والطالب بيحصل علي شهادة معتمدة من جامعة أسيوط وبتغير المسمي الوظيفي في البطاقة وبنأجل التجنيد سنة ورا سنة عن طريق وسيط بمصاريف لوحدها بعيد عن الدراسة مصاريف التجنيد ١٥٠٠ للسنة والدراسة بتكون في جامعة أسيوط “.
واستكمل المسؤل حديثه قائلا” بنقدم حاجة زي معهد خاص سنتين في كذا قسم في الدراسة من بينها تمريض وتحاليل وسياحة وفنادق وحاسب آلي وطبعا المصاريف الأقسام كلها ٤٠٠٠ جنيه في السنة ما عدا الحاسب الآلي ٣٥٠٠ وأحنا بنقبل من ثانوية عامة وأزهرية ودبلومات فنية وبناخد من بعد الإعدادية بشرط يكون فوق ١٨ سنة والشهادة بتكون معتمدة من جامعة طنطا مش جامعة أسيوط داه في حالة لو الطالب بعد الإعدادية واحنا فاتحين باب التقديم للطلاب لغاية 20/9/2021.
أكاديمية النيل
وبسؤال القائمين علي العمل في أكاديمية النيل قالوا “احنا معهد خاص بنقدم نظام الدراسة سنتين والطالب بيحصل علي شهادة معتمدة من جامعة أسيوط والمحاضرات بتكون في جامعة أسيوط وكمان الطالب يقدر يغير المسمي الوظيفي في البطاقة ومش بس كده أحنا كمان بنعين أوائل الطلبة والباقيين يتم تعينهم في أماكن خاصة أو عامة براحتهم هما معاهم كارنيه مزاولة مهنة وبنأجل التجنيد سنتين داه في خلال الدراسة لكن لو حاب الطالب يأجل بعد كدة داه بيبقي عن طريق مصاريف خاصة للتجنيد ١٨٠٠”.
وأوضح المسئول مميزات الدراسة في الأكاديمية قائلا ” عندنا أقسام مختلفة زي “تمريض – خدمات صحية – الحاسب الآلي- مساحة وخرائط “وطبعا عندنا نظام الدراسة عملي ونظري وبنقبل من ثانوية عامة وأزهرية ودبلومات فنية ومش بنقبل من الإعدادية وطبعا بتختلف المصاريف من قسم للتاني في قسم مصاريفه للسنة ٣٨٠٠ والأقسام التابعة للهندسة مصاريفها ٤٠٠٠ في السنة “.
مفاجأة صادمة
وقال أحمد البارودي المدير التنفيذي لمركز تسويق الخدمات لجامعة أسيوط ” مفيش عندنا حاجة اسمها معهد سنتين الشركات دي بتقدم دورة تدريبية طويلة المدى وبرامج تدريبية متخصصة في تدريب المجتمع المدني علي علوم التمريض والعلوم الطبية والتي تساعد أي فرد من أفراد المجتمع علي اكتساب مهارات التمريض والإنقاذ والرعاية الصحية والاهتمام الصحي لكبار السن ودا برنامج تدريبي علي مراحل والمرحلة الأولي ٣ شهور ممكن الطالب ياخد المرحلة الأولي وميكملش زي كورس الأنجليزي كده “
تأجيل التجنيد
واستكمل ” البارودي” حديثه قائلا بالنسبة لجزئية التجنيد ” دي دورات تدريبية ولا يحق لها تأجيل التجنيد والجامعة غير مسئولة عن أي أعمال خارجة أحنا كجامعة أسيوط بنخلي الطالب يمضي علي إقرار قبل الالتحاق بالدورة التدريبية بعدم أحقية الطالب في المطالبة بتأجيل التجنيد ازاي هما بيأجلوا التجنيد؟
واستنكر” البارودي” عمل هذه الأكاديميات قائلا ” مجلس الجامعة أصدر قرار بوقف التعاقدات للدورات التدريبية مفيش غير المراكز التابعة للجامعة هي التي تعمل حاليا ودي آخرها السنة دي 30/6/2022 مع تقفيل السنة المالية وبعد كده مش هتشتغل ازاي بقي المراكز دي شغالة ؟ وهنا بقي يجي دور مباحث الأموال العامة المفروض الجامعة أصدرت قرار مباحث الأموال العامة تشوف المتعاقدين مع الجامعة يشتغلوا حتى انتهاء العقد وغير المتعاقدين يتم إغلاق هذه الشركات”.
الجامعة منضبطة
بدوره قال دويب حسين، المستشار القانوني لمركز تسويق خدمات الجامعة، ” مفيش حاجة اسمها معاهد دي دورات تدريبية والطالب ملهوش أي حقوق عندنا غير أننا نقدم له دورة تدريبية تؤهله لسوق العمل الخارجي واحنا بنمضي الطالب علي إقرار بكده والطلبة اللي بيحصلوا علي الدورات دي أغلبهم مؤهلات عليا بس عايزين يكتسبوا خبرات لسوق العمل “.
واستكمل دويب حديثه قائلا ” زمان كنا بنسيب الطالب يدرس مع الأكاديمية أي هذه الشركات المتعاقدة مع الجامعة في المركز نفسه خارج الجامعة لكن حاليا تم تظبيط الأمور وحسمها وخلينا الطالب يدرس جوه الجامعة ومش بس كده المدربين كمان من جوه الجامعة والطالب بيحصل علي شهادة بالدورة التدريبية موثقة من الجامعة ولو حابب يوثقها خارجية براحته “.
وأوضح دويب خطورة الوضع قائلا ” الحمد لله أمورنا منضبطة بشكل كبير والجامعة حددت أربع شركات متعاقدين معاهم والباقيين مافيا وناس بتاخد مبالغ ضخمة من الناس وعملنا محاضر في قسم الشرطة بس المشكلة أن الناس والطلبة متعرفش حاجه زي كدة وبتروح تقدم في الأماكن دي “.
وأشار “دويب ” إلى حرص الجامعة علي الطلاب قائلا ” كجامعة مش بنتعاقد مع أي حد لازم تكون حاجة موثوقة بمعني أن لازم يكون في سجل تجاري وبطاقة ضريبية ومصرح من جهة حكومية والتعاقد بيتم طبقا لنموذج الجامعة وبناء علي سابقة أعمال موثقة والسمعة الحسنة للمكان وأصحابه مش أي حاجه وخلاص “.
وأكد” دويب ” على متابعة الجامعة للأعمال الخارجة ومحاولة الحد منها قائلا ” متعاقدين مثلا مع مكان زي أكاديمية الماسة علي أساس أنها دورات تدريبية ومره لاحظنا تجاوز في الإعلانات فعملنا محضر بالكلام دا في قسم الشرطة “.
وفيما يتعلق بتأجيل التجنيد قال: ” مفيش حاجة اسمها تأجيل تجنيد دي دورة تدريبية إزاي بتأجل التجنيد؟ أحنا كجامعة بنمضي الطالب كمان علي إقرار بالكلام داه ملهوش حق في المطالبة بتأجيل التجنيد وفي مستندات بالكلام داه طبعا “.
هذا وقد قمنا بسؤال إحدى الطالبات التي التحقت بإحدى هذه الشركات فقالت أنا طالبة في سنة ثانية في أكاديمية الألسن للعلوم الحديثة في قسم تحاليل وبناخد شهادة معتمدة من جامعة أسيوط ومعتمدة من التعليم وممكن من الخارجية يعني لو عايز تسافر تشتغل بيها بره تقدر عادي “.
واستكملت الطالبة حديثها قائلة ” الشغل بعد التخرج عندنا علي حسب القسم في ناس زمايلي شغالين في نجع سبع في معمل تحاليل والعمل لمدة 6 ساعات وراتب شهري 700 جنيه وأنا عن نفسي باخد العملي في مستشفي القدس وفي معامل ألفا بناخد العملي فيها وفي سنة أولي كنت بناخد المحاضرات في كلية تجارة وفي سنة ثانية بناخد المحاضرات في كلية تمريض “.
