خرجت الفنانة شيرين عبد الوهاب بتصريحات صادمة ومتضاربة حول حياتها مع زوجها السابق حسام حبيب حيث تراجعت عن كل تصريحاتها السابقة متهمه حسام بأنه سبب لها أزمات متلاحقه فى حياتها، و أنه المسئول عن حلاقة شعرها جاء ذلك خلال مداخلة هاتفية لبرنامج “كلمة أخيرة” والذى تقدمه لميس الحديدي.
شيرين تعتذر للجمهور
وقدمت شيرين اعتذارها إلى الجمهور على الهواء، قائلة: “عاوزة أستغفر ربنا على الكذب اللي كذبته عشان أخلي صورة إنسان تبقى كويسة وأنا كذبت ودي أكتر حاجة ربنا ميحبهاش”.
وأضافت : “كدبت في حاجات كتيرة أوى لأني بنت أصول وكنت عاوزة أرفع صورة إنسان ممكن يروح في يوم من الأيام يتجوز من عيلة تانية ولو كنت قلت كلام وحش وقتها مكانش هيعرف يتجوز وأنا نفسي يتجوز ويبعد عنى وأخلص منه”.
وقالت : حسام سرق العربية من قدام البيت.. سرق العربية مستغلا تواجدى فى الساحل.. أنا خرجت من الجوازة دى بالوكسة والحسرة.. دا إنسان خطر، لازم أروح اتعالج من آثاره عليا”.
عاطل بالوراثة
وأضافت : “كنت متكفلة بمصاريف بيته التانى (بيت والدى حسام حبيب) .. طول عمره ما بيشتغلش ، وأهله باصين لى فى كل حاجة.. لو عملت أغنية ناجحة أمه هتقول اشمعنى ابنى.. حسام حبيب عاطل بالوراثة”.
وتابعت : “أنا ست قاعدة في أمان الله مع بناتي، بقالنا 4 سنوات شايفين الويل، سافرنا الساحل وقلنا نقعد أربع أو خمس أيام ونرجع مبسوطين وتتحسن نفسية البنات ونفسيتي، ومكناش بنخرج ومكناش عايشين تقريبًا والبنات مكنوش بيعرفوا يقعدوا معايا.
لأني كنت عايشة مع زوج مش بيشتغل تقريبًا، وكنت محبوسة 24 ساعة في أوضة نومي مش بعمل حاجة، قاعدة بس، وأنا غلطت في حق نفسي، وكنت فاكرة أنى بحافظ على بيتى لكنى اكتشفت أنه ما كنش بيت، كانت عيشة فئران أو مصيدة أنا كنت زى الفار اللى بيدخل المصيدة ياكل حتة جبنة”.
وأضافت: “كنت عايشة مع راجل مش بيشتغل ولا بيخرج ولا بيشوف أهله ولا أصحابه وكل همه حب الامتلاك، ومع ذلك فضلت جمبه، وهو لا يعرف إلا فكرة حب الامتلاك، وصبرت لأنى كنت بحاول أنجح الحب ده ومكنتش بحب اتهزم وأنا بطبعى أكون خدامة الرجل اللي أعيش معاه”.
رد حسام حبيب
وقال حسام حبيب في تسجيل صوتي لأحد البرامج التليفزيونية: “أكيد هيبقى في إجراء قانوني .. عمري ما دافعت عن نفسي وعمري ما أتكلمت وده كلام كله مرسل وأنا الكلام اللي هرد بيه إنشاء الله كلام كله موثق ومش هقول كلام مرسل “.
وأضاف فى التسجيل : أنا بيتم ابتزازى وتهديدي من قبل شيرين
شيرين تدافع عن حسام حبيب
وكانت قد نفت سابقاً شيرين الاتهامات و الجدل بشأن مسؤولية طليقها حسام حول حلاقة شعر رأسها وصرحت في تغريدة على “تويتر”، عن استيائها بسبب الأخبار المتداولة حول تورط طليقها المطرب حسام حبيب في حلاقة شعر رأسها.
وقالت: “ليه ميكونش لوك جديد، ليه ميكونش تغيير، ليه ميكونش أنا اللي عملت كدة حتى لو عندي اكتئاب؟” وتساءلت: “ليه فرضتوا السيئ والأسوأ وظلمتوا شخص بريء وظلمتوني”.
وقالت الفنانة شيرين عبد الوهاب، إنها لا تعاني من أمراض نفسية، مضيفة: “معنديش أمراض نفسية ولو عندي مرض نفسي هقول لأني أنا ست حرة ومحدش يزايد عليا وفي الحفلة كنت بتريق على نفسي قبل ما يتريق حد عليا” جاء ذلك فى مداخلة مع الإعلامي عمرو أديب ببرنامج “الحكاية”
واختتمت : قبل زواجي قولت إننا لا نصلح عشان فارق السن ما بينا كان سنة واحدة”، مضيفة: “على فكرة أنا لسه بحبه” في إشارة لطليقها حسام حبيب.
