كشفت نجلة الفنان الراحل أحمد راتب عن تفاصيل حياته الشخصية وتعامله مع أبنائه وأحفاده.
وقالت خلال لقائها التليفزيوني مع الإعلامية لبنى عسل خلال برنامجها “الحياة اليوم “على “قناة الحياة”: “هو كان عنده 5 أحفاد أنا كان عندي بنت وأختي الكبيرة 3 أطفال وأختي التوأم كان معاها ولد فحضر من أحفاده 5 وهما دلوقتي 7 .. كان رقيق جدا والطفل عنده كان حاجه كبيرة محدش يقربلها يعني الطفل والحيوان هو كان رحيم بأي حاجة صغيرة وكان يزعل لو عاقبت بنتي”.
وتابعت:” أثر في أحفاده جدا جدا بحنيته وكل الأحفاد اللي شافوه فاكرينه لحد النهارده ومكنش عنده في الدنيا غير شغله وبيته وكان أسري جدا مكنش بيحب الصخب والخروج الكتير لأن مشقة التصوير اللي كانوا بيشوفوها بيخلي الممثل يبقى عاوز يرجع البيت ويهدى ويرتاح “.
وعند سؤالها عن الرسالة التي كتبها لابنتها قالت:” هو كان متعود أما كان بيكون في مناسبة عيد ميلاد حد مثلا من الأحفاد كان بيحب يكتب بخط أيده رسالة ليهم بتبقى ذكرى جميلة وهو كان بيعشق اللغة العربية”.
ثم قرأت الرسالة التي كان مضمونها:” إلى الحفيدة الأعز فاطيما .. جعلك الله قرة عين أبيك وأمك ومتعك بالصحة والسعادة وجعلك من أبناء السعادة دائما ونفع بك الوطن والناس.. جدك أحمد راتب”.
