هاجم الشاعر الغنائي الكبير بهاء الدين محمد، النجمة شيرين عبد الوهاب، بعد تصريحاتها الأخيرة حول ندمها غناء أغنية “ما تجرحنيش” التي كتب كلماتها بهاء الدين محمد.
وكتب بهاء الدين محمد، عبر حسابه الرسمي على “فيسبوك”: “مش متعود أرد على أي حد .. ولكن لما حد يتجاوز حدوده لازم يقف مكانه ويعرف إنه مهما إتعود يغلط لازم ييجي عند بعض الأسماء ويحاسب ويخلي باله وخاصة لما حد في كل كارثة يدافع عنها”.
وتابع: “حأتكلم بإختصار جدا.. المشهد الأول، أول يوم دخلت شيرين عبدالوهاب مكتبي كانت مع الأستاذ نصر محروس اللي هو صاحب الفضل في تقديمها وبعد دقائق من اللقاء لقينا شيرين بتبكي وسألها (نصر) بتعيطي ليه؟، ردت علشان أنا قاعدة مع الأستاذ بهاء”.
واستكمل: “المشهد الثاني.. رشحتها تغني (كتير بنعشق) ولولا موافقة نصر إحتراما للعشرة اللي بنا ماكانتش هتغنيها لأنها كانت موقوفه من النقابة”.
وأوضح: “المشهد الثالث.. لما فوجئت بمدير أعمالها الرجل اللي أنا بأحبه وبأحترمه لقيته بيكلمني نيابة عنها ويقولي سمعني الجديد وده طبعا خطأ لأن اللي بيغنى مهما كان إسمه مش المفروض يغلط غلطة زي دي، لأن المشهد ده مش لايق على المشهد الأول”.
وتابع: “المشهد الرابع والأخير، أغنية (ماتجرحنيش)، أنا لحد الأن مش عاجبني غُنا شيرين مع إحترامي الكامل لصوتها وأكيد لولا الأستاذ نصر ما كانش هيتم اللقاء، و(ماتجرحنيش) من أهم أعمالي ومن حقي أدافع عنها نتاج تهور اللي غنيتها”.
وأضاف: “وكمان لأول مرة ألاقى حد بيحارب نَفسه وبيغلط في مبدعين إشتركوا في صناعته.. وعشان أكتب الكلام ده يبقى شيرين غلطانة كالعادة بس كان لازم أقولها ما تعمليش كده تاني، وأنتي بتكبري بس مش هتعدى حدود حجم بعض الأسماء ولا أعمالهم” .
