مصطفى حسني
قال المخرج يسري نصر الله إن الكلمة التى ألقاها عن فيلليني في مهرجان القاهرة السينمائي حاول التركيز فيها على زيادة شغفه بالستات الممتلئات وتصويره أنيتا اكبرج (الممتلئة) في نافورة تريفي ” كانت إشارة واضحة للبعض ويمكن غامضة للبعض الآخر للست الممتلئة الغلبانة المقبوض عليها بتهمة الإساءة للآثار وللزي الفرعوني والمش عارف إيه”.
وأضاف، عبر حسابه الشخصي على “فيسبوك”:” الست المصرية ممتلئة عامة والراجل المصري أسمر وتقاطيعه مش مسمسمة عامة والآثار على حد علمي ملكنا كلنا مش ملك خاص لبتوع الهيئة الفلانية والوزارة العلانية إللي شغلتهم بالتأكيد مش تحديد مين يقدر يتصور جنبهم ويبقى لابس إيه والمؤكد إن مافيش أي لائحة ولا قانون بيحدد وزن إللي حابب يتصور عند الآثار”.
واستكمل:” أفهم إنهم يتنرفزوا لو إللي بيتصور قالع. بس لابس؟ وكمان لابس نفس اللبس إللي بنشوفه في المسلسلات والأفلام اللي فيها تصوراتنا عن الفراعنة؟”
واختتم حديثه قائلا ” ألف رحمة عليك يا فيلليني، بس الحمدلله إنك عشت وعملت أفلامك في فترة العالم ما كانش لسة خلقه ضيق كده.”
