أعتادت المطربة شيرين عبد الوهاب،أثارت الأزمات فى أغلب تصريحاتها ولكن أزمة اليوم جاءت فى تعليقها على سؤال من أحد المتابعين عن الأغنية التى ندمت على تقديمها لتجيب أغنية “ماتجرحنيش” لتثير أزمة جديدة بينها وبين الشاعر بهاء الدين محمد، عبر صفحات التواصل الاجتماعى.
وعلق الشاعر بهاء الدين محمد على هذا التصريح، عبر حسابه الرسمي بـ فيس بوك قائلاً : مش متعود أرد على أي حد.. ولكن لما حد يتجاوز حدوده لازم يقف مكانه، ويعرف إنه مهما اتعود يغلط لازم ييجى عند بعض الأسماء ويحاسب ويخلى باله، وخاصة لما حد في كل كارثة يدافع عنها.. وهتكلم باختصار جدا.
وتابع فى منشوره : المشهد الأول، أول يوم دخلت شيرين عبد الوهاب مكتبي كانت مع الأستاذ نصر محروس، اللي هو صاحب الفضل في تقديمها، وبعد دقائق من اللقاء لقينا شيرين بتبكي وسألها نصر بتعيطي ليه ردت علشان أنا قاعدة مع الأستاذ بهاء.
وأضاف: والمشهد الثاني رشحتها تغني كتير بنعشق، ولولا موافقة نصر احتراما للعشرة اللي بنا ماكانتش هتغنيها، لأنها كانت موقوفه من النقابة.
واستكمل: المشهد الثالث لما فوجئت بمدير أعمالها الراجل اللي أنا بحبه وبحترمه، لقيته بيكلمنى نيابة عنها ويقولي سمعني الجديد، وده طبعا خطأ لأن اللى بيغني مهما كان اسمه مش المفروض يغلط غلطة زي دي، لأن المشهد ده مش لايق على المشهد الأول.. المشهد الرابع والأخيرأغنية ماتجرحنيش أنا لحد الآن مش عاجبني غُنا شيرين مع احترامي الكامل لصوتها، وأكيد لولا الأستاذ نصر ماكانش هيتم اللقاء.. وماتجرحنيش من أهم أعمالي ومن حقي أدافع عنها نتاج تهور اللي غنيتها.
واختتم منشوره : وكمان لأول مره ألاقي حد بيحارب نَفسه وبيغلط في مبدعين اشتركوا في صناعته.. وعشان أكتب الكلام ده يبقى شيرين غلطانه كالعادة، بس كان لازم أقولها ما تعمليش كده تاني وأنتي بتكبري بس مش هتعدي حدود حجم بعض الأسماء ولا أعمالهم.
كذلك علق الشاعر الغنائي تامر حسين على مدافعاً عن شيرين قائلاً : أستاذنا وكبيرنا عبقري العباقرة هو احنا عندنا كام بهاء الدين محمد؟.. تاريخ عظيم واستمرارية لحد يومنا وأنا الحقيقة معرفش ده رد شيرين بنفسها، ولا حد من إدارة السوشيال ميديا، ويمكن خانها التعبير أو ما تقصدش العمل الفني، لأنها أغنية قيمة كلام ولحن وتوزيع وخاطرك كبير عندنا كلنا، أستاذنا ولا تزعل نفسك، أكيد شيرين مايرضيهاش يوصلك الإحساس ده، يا تاريخ ياحبيبي، وأغانيك العظيمة لو كتبتهالك في بوست مش هنخلص.
