حلت الفنانة أصالة نصرى ضيفة في برنامج “معكم” الذي تقدمه الإعلامية منى الشاذلى، المذاع على قناة Cbc.
وقالت عن خلعها للحذاء في الحفلات : “بكون عاوزة أبقى على راحتى لما بقلع الجزمة بغنى أفضل، لأن أنا لما بغنى بحس أن كل أعضاء جسمى بتتحرك وبحس أنى بقف على أطراف أصابعى وكأنى برقص باليه، لأن اغلب الأحذية مش بتكون مريحة وأنا صوتى أهم شيء ولما بغنى حافية بيكون أحلى مليون مرة لما أكون لبساها، ومش عاوزة صوتى يتأثر بشئ وكويس إن فستانى كمان مش بيضايقنى وبيكون مريح، ولو عليا نفسى البس جلابية اللى متخيطة على اليد وأحط سبحتين برقبتى واطلع أغنى على المسرح”.
وأضافت : “اقتنعت مؤخرا بعد ما عيشت مع نفسى كل أنواع المواقف، وتوحدت مع نفسى وعيشت مع حالى كأنى شخصين، لأن تفاصيل اللى حصلى كان أكبر من قدرتى أنى أتحمله وأعيشه لوحدى، فعيشت مرحلة طويلة كأنى شخصين وأن واحدة تطبطب على الثانية”.
وتابعت : “كنت بقضى وقت طويل لوحدى بعيد عن أولادى وأهلى، ولما بقيت شخصين ارتحت، ومبقاش في حاجة تخوفنى، وأنا طبعا بحترم كل الناس ولكن مبقاش في شخص بيرعبنى، لأن في السابق كنت بقسى على نفسى وحالى إنسانيا واجتماعيا، وحاليا بقيت صديق لنفسى، لأن زمان كانت نفسى هي في آخر القائمة، ومبقتش بهتم غير بتفاصيل شغلى بس”.
