فن ومنوعات

قصيدة جديدة للصارم ..ماجاش

الشاعر/ أحمد الصارم 

ماجاش اللي أنت مستنيه
وقلت عليه
وخدت أيام بتتلوى ع سريرك
وتتقلب..وبتقلب
ف أفكارك عشان تلاقيه
ماجاش…
وكان الوعد ع الراحة.وبالراحة
يعدى العمر كده طلقة
وماارتاحتش…وماسمعتش
ف يوم كلمة تبل الريق
يا ألف غريقوألف برئ
في صورة حد كان عايش ومش عايش
شرب من فرحه أخر زيق…!!
ماجاش….
ماجاش الدمع ولا خبط ع عيني
وأنا عيني بتحلم بيه
ماجتشي الضحكة ع وشي تواسيني
تخبيني من اللي أنا فيه
بقيت فاقد لمعنى المعنى جوايا
بقيت تايه
بقيت بتغطى بقصيدةوبتعريني تغريدة
وبتعلق كده بقشة.مجرد وهم ورسمته
واعيشه كأنه دنياياه
ماجاش…
ماجاش الحلم ولو إنه وعدني كتير
هيجي ف يوم
هيجي يلم أيامي مع دموعي
ويغسل بقعة الماضي ع كمامي
ويتغير معاه وضعي مع إنه
مفيش تغير ف ليلة ويوم
وبعد الصدمة إنه ماجاش…!!
لقتني بفوق وأنا فايق
مفيش واحد بياخده الموت
وندعيله بطولت العمردي بتضايق…!!
مفيش أحلام هتتحقق وأنا قاعد….وأنا ساند
ع الدعوة وع التباريك
وع التماحيك
ف آي عزيز..ياريت والله تدعيلي بفك الكرب…!!
ماهياش حرب
ماهياش كيميا ومعادلة وحاصل ضرب
مفيش أحلام هتتحقق وأنا قاعد…!!

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى