كشفت الفنانة حورية فرغلي تفاصيل وفاة خطيبها والذي رحل قبل يوم واحد من حفل الزفاف وتحدثت عن الكثير من التفاصيل الخاصة بعلاقتهما للمرة الأولى وماحدث بعد رحيله وكيف عانت.
وأكدت حورية فرغلي أنه الرجل الوحيد الذي أحبته، بالرغم من مرور 21 عام على رحيله، لم يستطيع أي رجل آخر أن يأخد مكانه فى قلبها.
جاء حديث حورية فرغلي أثناء لقائها مع الفنان تامر شلتوت لبرنامج «في العمق» وقالت: «أنا شُفت الحب مرة واحدة في حياتي سنة 2002، مع خطيبي اللي تُوفي، ومن بعده محبتش حد تاني رغم مرور 21 سنة، خطيبي اللي مات كان 175 كيلو، وكان عنده مشكلة في رجله الشمال، فكان يعاني من مشكلة خلال المشي، وكنا قد بعض في السن».
حورية فرغلي: رغم مرضه كنت بشوفه أحلى راجل
وتابعت حورية فرغلي: «رغم مرضه لكن كنت بشوفه أحلى راجل في الدنيا، والناس كلها تقول إيه الجنان ده، لكن مكنتش ببص لكلامهم بصيت لقلبه واللي جواه، كفاية إني سامعة صوته، كفاية وجوده في المكان ريحة برفانه، من ساعة ما مات وأنا مش لاقية حد غيره».
وتابعت حورية فرغلي: «قضينا سنتين سوا متخانقناش مرة، كل ما أطلع الأولى في الفروسية أروح البيت ألاقية جايب لي تورتة كبيرة عليها صورتي ولعب، بدور على حبه مش لاقية، ساعات بقول لنفسي أنا شُفت الحب ده كله ليه لما في الآخر هيتاخد مني، لكن ربنا اللي عايز كدة».
وأستكملت: «من بعد وفاته مرتبطش بحد ولا حد أتقدم لي، رغم مرور 21 سنة مشوفتش زيه، مش عارفة ليه، بتحب كتير بس بتصدم لما أعرف السن، وفي شاب بعت لي رسالة طويلة يعبر فيها عن حبه لي، قلت له أنت عندك كام سنة، قالي 22 سنة قُلت له انت قولي يا طنط».
حورية فرغلي: مليش أصحاب
واردفت: «أنا معنديش صحاب ومبخرجش خالص، وبحب الحيوانات جداً، كان عندي 13 كلب دلوقتي بقا 1، وعندي 8 أحصنة، مبخرجش مع الناس لأن محدش بيعزمني على حاجة، اتعودت اعيش لوحدي وبراحتي، بيتهئلي لو أتجوزت مش هستحمل حد ينام جمبي على السرير، كمان هيبقى في مشكلة، لأني بحب أمشي في شقتي براحتي وأجري مع الكلاب، مش شرط كل يوم ميكب وشعر ورموش، أنا باكل ضوافري أصلاً».
يذكر أن حورية فرغلي عانت من الكثير من الأزمات التي بدأت منذ ميلادها حيث انفصل والداها وعمرها 48 يوم فقط، مما أدى إلى شعورها بالوحدة منذ الطفولة لم يكتفي القدر بوحدة الطفولة ولكنها مرت بالكثير من الأزمات التى كان أخرها عملية استئصال الرحم بالكامل.
