تحدث الفنان محمد رياض، عن عمله قبل أن يتجه إلى الفن وقال إنه تخرج في كلية العلوم، وكان يحب الكيمياء للغاية، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه.
جاء ذلك خلال حواره في برنامج “معكم منى الشاذلي”، على قناة cbc وأضاف: “أنا اخترعت حاجات.. والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع اكمل عشان التمثيل، وكنت شغال في الأبحاث والتطوير بتاع الشركة”.
وأضاف محمد رياض: “أنا كنت لسه متخرج من كلية علوم وشغال كيمائي الصبح وبشتغل في معمل تحاليل وبشتغل في مدرسة بنات 3 أيام في الأسبوع لكنهم رفدوني”.
تابع: “كنت لسه صغير عندي 22 سنة وشعري أصفر وحليوة وبروح لابس تيشيرت وبنطلون جينز.. وأول ما دخلت المدرسة لقيت الطابور بقى فيه همس.. بنات بقى كلهم 18 سنة وعمالين بيتكلموا مين ده وبتاع”.
واستكمل: “شوية ودخلت الفصل لقيت كله بنات وقاعدين جنب بعض بين الديسكات وزحمه، طلع إن البنات جم من فصول تانية يحضروا حصة الكيمياء.. يعني المفروض الفصل 25 بـنت لقيت عندي 60 بنت.. وتقريبا الكيميا احلوت في عينهم ساعتها”.
وأشار محمد رياض إلى أنه في اليوم التالي طلب منه المدير ألا يحضر طابور الصباح ثانية، ففعل ذلك، واستمر في العمل لفترة، إلى أن استدعاه المدير مرة ثانية لمكتبه، قائلا: “المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا.. أنا عندي بنات صغيرين ومينفعش احط الزيت جنب النار.. واترفدت من غير ما اعمل حاجة”.
