قالت الفنانة سمية الخشاب، إنها لا تعترف بشيء اسمه فالنتاين ولا عيد الحب وتخصيص يوم معين له، متابعة: اللي بيحب بيهتم بحبيبه في أي وقت، ويشتري له هدية حلوة في أي يوم، ولو فاكرني في الأيام العادية ده أحلى بكتير، وفي المناسبات ميضرش، الستات عموما بيحبوا الهدايا.
وتابعت سمية الخشاب، في تصريحات تليفزيونية لها: أنا عقلانية رومانسية، وأسمح لعقلي بالتدخل في الوقت المناسب، وهذا سر بقائي على قيد الحياة.
واستكملت: أنا من مواليد برج الميزان، برح النحانيح في الحب، وفتاة برج الميزان عطاءة جدا ومتفانية في الحب عشان تسعد حبيبها على حساب نفسها، لكن لو أحست إنه لا يبادلها شعورها ولا يوجد أي تقدير تقلب قلبة وحشة.
وحول وجود علاقة عاطفية، فردت قائلة: قلبي مينفعش يبقى مغلق، ودايما جاهزة أحب وأتحب.
وأضافت: مش عايزين نقول إن الحب هو الحب بين راجل وست وخلاص، الحب إنك تحبي نفسك وتقدري نفسك، وتمتني لكل حاجة حلوة في حياتك وتشكري ربنا طول الوقت عليها وفي الأيام دي ممكن أجيب لنفسي بيجامة حلوة تدفيني في البرد ده، أو بيرفيوم أو أي حاجة ناقصاني أشتريها وأفرح بيها، وبقول لكل فتاة.. حبي نفسك واشتري هدية لنفسك ودلعي نفسك وانبسطي.
يذكر أن عيد الحب يحتفل به العالم في يوم الثلاثاء 14 فبراير الجاري هذا العام 2023.
