علق الفنان الكبير محمد منير ” الكينج ” على جائحة كورونا قائلاً : ” واضح إننا أغضبنا ربنا في العالم كله وأتذكر فيلسوف ألماني كان بيكلمني قريباً وبيقلي إن دي لعنة من لعنات ربنا والكمبيوتر برضه وده رأيه مش رأيي بس أنا بأيده .”
وقال “منير”، في مداخلة هاتفية عبر برنامج ” كلمة أخيرة ” الذي تقدمه الإعلامية لميس الحديدي على شاشة ” ON” في معرض تعليقه على علاقته الخاصة بألمانيا والشعب الألماني: ” أنا موجود هناك من سنة 1991 عشان كده سر علاقتي بيهم أني كل ما بسافر بسافر بباسبور مصري وبرجع برضه بباسبور مصري فيبقى الوطن الأول هو مصر والوطن الثاني هو ألمانيا ومحدش بينسى مصر بلده أبدا وعشان كده أنا بعتب على الأجيال الجديدة في الفكرة دي ولسه منذ فترة كان بيكلمني تلميذ ليا ألماني كان المدير الإعلامي لنادي بارين ميونخ وماسك منصب كبير زي عدلي القيعي ومحمود الخطيب “.
وحول تعاونه مع الشباب الجدد قال : بمجرد بصة على كل ألبوماتي هتلاقي عناصر شابة لان ماعدش فاضل حد الأبنودي مات وسيد حجاب مات وعبد الرحيم منصور مات اللي فاضل بالنسبة لي مجدي نجيب وغالباً أغنيته الشهر القادم وده اللي فاضل من الحلوين والباقي كله مواهب جديدة والمواهب دي دائماً بشوفها بشكل جديد وبتستغرق وقت كبير وبتعب الموزعين واللي بيكتبوا أو بيلحنوا الأغاني معايا لأني بحلم بيها وبشوفها كمواهب بشكل أخر كنت معتاد على الناس الكبيرة الله يرحمهم .
