نورا سعد وسامح الألفي
“عمو ضربني بالقلم على وشي وقعني على الأرض من غير ما أعمله حاجة، قولتله حرام عليك يا عمو أنا صغير وعيطت مشيت من قدامه”، بهذه الكلمات الحزينة وبصوت يملؤه الشعور بالقهر والظلم بدأ الطفل “سامح” المعتدى عليه بالضرب من قبل أحد الأشخاص بأحد مولات المنصورة حديثه مع محررا اليوم الإخباري .
قال الطفل المعتدى: بابا بيشتغل سايس عربيات ومسؤول عن الجراج المجاور لمول كازيون، وكان راح يكشف على إخواتي عند الدكتور، وقالي خلي بالك لحد ما أرجع، وبعدها جه عمو قالي هدخل اجيب حاجة من المول في 10 دقايق، وقعد أكتر من نصف ساعة ، لغتية ما جه واحد تبع جراج عمارة عايز يدخل لقيت عربية عمو قافلة الطريق.
وتابع : فدخلتله المول بقوله بعد إذنك حرك العربية عشان نوسع الطريق راح ضاربني بالقلم على وشي”. وتابع: “اتصلت بـ بابا وبلغته باللي حصل وخليت صاحبه يكلمه عشان يتابع معايا وياخد لي حقي بس لما ضربني الراجل الكبير أنا عيطت ومشيت من قدامه” وعمي صاحب بابا قال خلاص هو راجل كبير واحنا حلينا الموضوع.
وكشف محمد الصاوي والد الطفل سامح، في تصريحات لـ” اليوم“أنا مجاش في دماغي إن ضربه بكل القسوة دي، ابني غلط في ايه قاله ممكن تشيل العربية عشان ناس تعرف تتدخل الجراج، أنا كنت ناوي أسامح وأنسى لولا أن شوفت الفيديو وشوفت ضربته لابني بكل القسوة”.
وتابع أنا كنت خارج المنزل فتلقيت اتصال من سامح ابني بيكلمني من تليفون واحد صاحبي منهار وقال لي في راجل ضربني، فكلمت صاحبي وبلغته يروح معاه شوف مين اللي ضربه مكنتش متوقع إنه رجل كبير هو اللي ضربه،
وتابع: “لما رجعت البيت لقيت ابني نايم تعبان سألته أيه اللي حصل قالي في واحد ضربني في أوكازيون وجبت الفيديو من الكاميرات لقيت فيديو ضرب سامح وحاجه مهينة جدا.. أنا بستغرب ايه اللي يخلي راجل زي ده يضرب طفل 9 سنين بالقسوه دي”.
واستكمل: “بعد الواقعة توجهت إلى قسم ثان المنصورة وحررت محضر، وأخدوا أقوال سامح ابني ولكن المحضر بدون اسم، ولابد من وجود اسم الشخص اللي ضرب ابني حتى لا يتم حفظ المحضر، بس أنا مش هسيب حق ابني”
وفي ذات السياق، قالت مروة ماهر التي نشرت الفيديو على صفحات التواصل، في تصريحات ل اليوم”: “الطفل بعد الواقعة كان منهار بسبب ما حدث له، وتحدث لنا بقهر أنا عملت ايه عشان يضربني كده”، مضيفة: “لما لقيت الطفل منهار من البكاء سألته ايه اللي حصل قالي راجل ضربني ولما خرجنا نسأله ضربته ليه زعق ومشي نزلت المقطع على مواقع التواصل.
وكان قد تداول نشطاء موقع التواصل الاجتماعي في مدينة المنصورة ، فيديو اعتداء رجل على طفل عمره 8 سنوات داخل أحد المولات.
