نجم من طراز خاص درس بالمعهد العالي للفنون المسرحية و تتلمذ علي يد أستاذ من أساتذة الفن.. نور الشريف فتعلم الكثير تشعر أنه جاء من زمن الكبار عاشق للمسرح يجتهد ليقدم الأفضل لجمهوره بعد نجاحه المتميز ..عابد عناني
- قدمت أعمال درامية أكثر من السينما، هل لانك تفضلها؟
دي حقيقة ولذلك اهتم حالياً بالسينما أنا أحب التمثيل وأنا بدايتي ونشأتي كانت في المسرح قدمت أعمال مسرحية كثيرة وأقدم حالياً ثلاث مسرحيات أنا عاشق للتمثيل والمسرح يعطي مساحة كبيرة ويشبع رغباتي في التمثيل ،ومؤخراً السينما تعوض ذلك بعض الشئ لانك بتشتغلي بشكل سريع ولكن مؤثر.
هل تري المسلسلات القصيرة هي النوعية القادمة في الدراما ؟
بالنسبة للدراما أفضل نوعية المسلسلات القصيرة ٥ أو ٦ حلقات لا أميل للأعمال الدرامية الطويلة لأني أشعر بالتطويل ماالفائدة من كثرة مشاهد الدور بدون تأثير عندما يقدم المسلسل في ٦٠ حلقة يجب ان يتم الأعداد له في سنه علي الأقل ٦ شهور ٦٠ حلقة يعني ٣٢ ساعة محتاج تشتغل عليها ٣ أو ٤ شهور عشان اخلق شخصيات وعلاقات وحواديت بدون تطويل يجعل المشاهد يمل وبروفات ورؤية المخرج ولكن فكرة نكتب بعض الحلقات وندخل نصور دون رؤية واضحة ليه مانعملش مسلسلات قصيرة نبقي عارفين بنعمل ايه باتقان ونقدم عمل ذو جودة ومضمون ونحترم انفسنا ،حلقات وبعد ذلك تتعدد الأجزاء.
- في الفترة الأخيرة يتم الكتابة أثناء التصوير والممثل يوافق ويتعاقد علي العمل وهو لايعرفه، هل توافق علي عمل لم يكتب بعد ؟
لو واثق في المخرج ممكن أعمل كدا لأني هبقي عارف المخرج دا هيعمل أيه لكن فيما عدا ذلك لا طبعاً.
- ماذا قدمت لك الدراما ؟
الأعمال الدرامية قدمت لي الكثير ودا لأني كنت محظوظ أدواري كانت في أعمال مميزة مثل الاختيار ،فوق مستوي الشبهات،ليالي اوجيني، الطاووس،خطوات الشيطان أعمال ذات قيمة فنية عالية جداً .
- دورك في الاختيار نهنئك عليه وعلي النجاح الكبير الذي حققته ،هل الاختيار كان نقطة تحول بالنسبة ليك ؟
هو لم يكن نقطة تحول ولكنه ضاعف من نجاحي انا بدأت التمثيل منذ ١٧ عام ،التحقت بالمعهد العالي للفنون المسرحية منذ عام ٢٠٠٣ ومنذ ذلك الوقت أقدم أدوار بالمسرح تخرجت من المعهد ٢٠٠٨ بعد التخرج قدمت أول ادواري الدرامية مع الأستاذ نور الشريف في مسلسل “متخافوش” وبعد ذلك ” عرفه البحر ” و”خطوات الشيطان” بجزئيه وقدمت ” ليالي اوجيني ” أشتغلت فترة طويلة جداً..ولكن “الاختيار” كان نجاح استثنائي لانه جيد الصنع ويناقش قضية مهمة ولانه مدعوم من الدولة ودا شئ مهم ،كان يذاع وقت الكورونا ودا ساهم في زيادة عدد المشاهدين ولأن احداثه واقعية عاصرها اغلبنا كان مؤثر في الناس وكان نجاحه كبير ونقله كبيرة لجميع نجومه ،النجم الكبير جداً أمير كراره اتنقل نقله كبيرة بعد الاختيار، أحمد مكي في الجزء الثاني قدم نفسه للجمهور بشكل جديد في “الاختيار ٢” هذا المسلسل عمل بطبيعته نقله لكل من يشترك فيه ، بيتر ميمي قدم فيلم ” موسي” ويقدم عمل عالمي والعوضي قدم عمل كبير مع ياسمين عبد العزيز فالاختبار نقله واضافه للجميع .
- هل ممكن نشوفك في أجزاء أخري من الاختيار؟
ياريت طبعاً ، عندما تلقيت اتصال من دكتور بيتر ميمي بأني موجود في الاختيار ٢ بنفس شخصية عماد عبدالحميد كنت في قمة السعادة ولكن لم أكن أعرف كيف ذلك وقد مات في الجزء الأول ولكن تم ذلك بحبكه درامية وفلاش باك للأحداث وأتمنى أكون موجود في الأجزاء القادمة بنفس الشخصية أو بشخصية جديدة .
- مسلسل الطاووس حقق نجاح كبير جداً،هل الإشاعات التي اثيرت عن ايقافه أفادت المسلسل؟
طبعاً..المسلسل استفاد بشكل كبير جداً قبل رمضان بأيام بشكل تجاري كان المسلسل هيعرض علي قناة أو اثنين او أربعة قبل رمضان بيوم المسلسل قرر عرضه علي ١٤ قناة بسبب اللي حصل وبعد سابع حلقة الجدل اللي أثير حول التحقيق مع الجهة المنتجة خلي الناس تتابع ، ذي ماعمر طاهر قال هم قدموا لصناع العمل دا خدمة ،لأن انتي داخله عمل بيتكلم عن قضية اجتماعية مش ذي السائد مفيش فيه قضية بلطجة ،مفيش بطل مفتري وبطل طيب بيحاربوا بعض مفيش الخلطة اللي الشعب المصري بيحبها بيتكلم عن قضية اجتماعية تمس قضايا كتير دينية وطبقية مش طبيعي تنجح في المنافسة الشديدة دي لقينا الإنطباع.. لا ياجماعة الناس دي عاملة حاجة كويسة ومتصدقة فاللي مكنش بيتفرج بدأ يتفرج فطبعا المسلسل إستفاد .
- بعد نجاح ادوارك في الاختيار والطاووس، أدوار الشر هتكون مفضلة عندك ولا هتعمل تنوع وتبعد عن اللي قدمته ونجحت فيه؟
والله المبدأ في إني أوفق علي أي دور هو أحساسي أنه هيطلع حاجة جديدة جوايا ياسلام بقي لو انا هطلع حاجة جديدة جواه ، يعني بشتغل علي الشخصية لغاية لما أشوف فيها بُعد المؤلف كان حاطه لكن مش مبروزه قوي فأفضل اخلق فيه وكدا ابقي كسبت الحسنيين ذي مابيقولوا، فلو حتي دور شر لكن هيقدم شئ جديد هعمله ، والتخوف دا كان جوايا بعد الاختيار والطاووس إني أقدم دور في فيلم ” فارس” من بطولة أحمد زاهر للأستاذ رؤوف عبد العزيز لأن كدا ٣ أدوار شر وراء بعض لكن أنا أعتقد أن دور زين في الطاووس غير عماد في الاختيار ودا مش رأيى لكن ناس كتير بتقابلني تقولي قعدنا حلقتين ثلاثة مش رابطين أن دا عماد عبد الحميد يمكن لأن الشكل كان مختلف هحاول في فيلم فارس أني اشتغل علي تركيبة تانية لأن الشكل يشبه كثيراً عماد عبد الحميد فطول ماانا لاقي حاجة جديدة داخل الشخصية مش هيفرق معاي هو شر ولا لا ودلوقت بحاول احط نفسي في التحدي دا أني اعمل كذا شخصية جنب بعض بعيداً عن تركيبة الشر يمكن الدور اللي بقدمه في فيلم ” في القلب” اللي بيتكلم عن دكتور ليه وجهة نظر أن الأشياء ليست صحيحة فقط لأنها علمية في جزء إنساني الدور مساحته مش كبيرة ولكنه يحمل فكرة الفيلم، في دور كمان في فيلم “الباب الاخضر” مع إياد نصار وخالد الصاوي تأليف الراحل أسامه أنور عكاشة بعتبره أهم دور في حياتي مع أن الدور ٣ مشاهد.
- ممكن تكلمنا عن أبعاد الدور ؟
مش هقدر أتكلم عن الدور ولكن اللي مخليني متحمس جداً الأستاذ رؤوف عبد العزيز مُحترم أن الورق دا للأستاذ أسامه أنور عكاشة أحنا بنذاكره ونفهمه وبنعمل عليه بروفات . - ممكن نشوفك في عمل كوميدي ولا تفضل أدوار في المسرح بعيدة عن الكوميديا ؟
بالعكس المسرح فيه جزء كبير كوميدي والشعب المصري اتصدر له في فترة الثمانينات والتسعينات وبداية ٢٠٠٠ أن المسرح كوميديا بس وياريت يبقي في دور وحد يشوفني في منطقة جديدة أعرف أدور علي حاجة جوايا أطلعها، مفيش فرق عندي في التمثيل وفي أدوار بتكون تراجيديا جداً ومأساوي وتلاقي جواها حاجة تضحك ذي شخصية عماد عبد الحميد في الاختيار وموقف العربية الفيرنا اللي كان مهتم بيها دا شارك في نجاح الدور من جوا الشخصية لأن الكوميديا مش لازم أمسك الدور وأشوف هحط كام افيه واعمل كام لازمة وامثل ذي اللي طالعين في المقدر جديد بيمثلوا بالسجع والقافية ممكن تكون طريقة جميلة وفي ناس بتحبها ولكن مش كل الناس لازم تبقي شبه بعض .
- أيه رأيك في أغاني المهرجانات؟
بسمعها ولكنها مش مفضلة عندي أفضل الرآب بحب ويجز جداً وابو الانوار وبحب امين يوسف وأنا أصلا ذائقتي في السمع ثقيلة بعض الشئ أنا بسمع شفيقة وجورج وسوف وعدوية وعبد الباسط حمودة ومش ضد المهرجانات هم بيغنوا اللي بيحسوا بيه وأنا ضد المنع مادام لم يقدم شئ يؤذي الزوق العام ولم يؤذيني أو يؤذي أطفالي أحب التنوع بسمع موسيقي أرجنتيني واسباني وبسمع مهرجانات .
- كلمنا عن أخر أعمالك ؟
قدمت حدوتة ذي القمر مع دره تأليف أحمد فرغلي وأخرج شيرين عادل وبعدها حدوتة بطولة ايتن عامر وتيام قمر ومحسن منصور اسمها وأنا قبلت، وأن شاء الله ابتديت مسلسل الثمانية تأليف تركي ال شيخ وبطولة خالد الصاوي وآسر ياسين وغادة عادل هو مسلسل هيتعرض علي شاهد واشارك كضيف شرف في الحلقة الأخيرة.
- من وجهة نظرك الترند والسوشيال ميديا مقياس لنجاح الفنان ؟
هو انعكاس طبعا مش محتاج أتكلم أن جزء كبير من السوشيال ميديا مصطنع بس في الأخر مفيش دخان من غير نار بل هي إنعكاس لشئ ما شئ جيد شئ سئ ببساطة شديدة تملك زر unfollow اللي تقدر تقضي بيه علي ظاهرة مش عجباك .
- ماهو الحلم الذي لم تحققه ؟
أني أقدم مسلسل أو فيلم باللغة العربية الفصحي مش مهم الدور ايه و تكون في نسبة ١ % مش ١٠ % من الأعمال المقدمة باللغة العربية عشان نحافظ علي لغتنا .
- كان دائماً رمضان لا يخلوا من عمل باللغة العربية الفصحى ،ليه صناع الأعمال الفنية بيبعدوا عن هذة النوعية الان ؟
أنا لا أجد تفسير وغير متفهم السبب أحيانا يقال التكلفة ولكني أري أن هناك مبالغ كبيرة تدفع لنجم واحد في العمل أو تكلفة السفر للتصوير بالخارج فالتكلفة مش سبب .
- هل أنت أهلاوي أم زملكاوي ؟ ورأيك في التعصب الكروي؟
أنا أهلاوي ولكن أكتفي بمعرفة النتيجة ..يمكن لأني كنت فاشل فيها وأرى أن ألطف حاجة في موضوع الأهلي والزمالك عندنا هو التعصب بعيداً عن المشاكل وإراقة الدماء بيضحكني غالباً .
