تداول رواد مواقع التواصل الاجتماعي الأيام الماضية، فيديو لشباب، يقوم بتوزيع الفوانيس على المارة، بهدف إدخال السرور والبهجة على قلوبهم، ورسم البسمة على وجوههم لهذا تواصل موقع اليوم الاخباري، مع “عمار أشرف” صاحب الفيديو، الذي حقق ملايين المشاهدات في وقت قصير، ليحدثنا عن هذه التجربة الجميلة.
بدا عمار حديثه قائلًا: «أنا بحب التصوير، وكنت بحاول على قد ما أقدر أبسط الناس البسيطة، بأني أصورهم وهما بيضحكوا واطبعلهم صورهم، وكانوا لما يشوفوها بينسوا اي تعب ويفرحوا جدا، وفي مره اقترح عليا صديقي محمد بمناسبة حلول شهر رمضان الكريم ، أن أحنا نوزع فوانيس على الناس ونصورهم ونشوف ضحكتهم ونفرحهم بالحاجة البسيطة دي، فبدانا ننفذ الفكرة بالفعل».
وبسؤاله عن توقعاته لنجاح الفيديو أجاب قائلًا: «ماكنتش متوقع النجاح والانتشار ده كله بصراحة ، أنا صورت الفيديو وصحيت لقيت تاني يوم مصر كلها بتتكلم عنه، وده بسطني أكتر لان هدفي ما كنش شهرة، هدفي ادخال البهجة والفرحة على قلوب الناس البسيطة دي ،اللي فرحتني انا قبلهم».
أما عن ردود أفعال الناس، أضاف عمار: «الناس كانت فرحانه جدا ومبسوطة، ومحدش خالص رفض انه ياخد الفانوس ،وده اللي خلاني أجيب عدد أكبر، وأنزل إسكندرية وأكمل توزيع، ونفسي أكمل توزيع فوانيس في باقي محافظات مصر كلها، عشان أسعد ناس أكتر، وهستمر في تنفيذ الفكرة خلال رمضان بأذن الله».
واختتم حديثه قائلًا: «الرسالة اللي حابب أوصلها من فيديوهاتي هي الإيجابية، وتغيير منظور السوشيال ميديا للأفضل، ومضايقتش خالص من الناس اللي حاولت تقلد الفكرة، ده بالعكس فرحت جدا، أن الفكرة بدأت تتنفذ وتتشاف بالشكل ده، والناس بتحاول تبسط غيرها ودي حاجه جميلة، لأن كل واحد بيحاول يبسط غيره بطريقته الخاصة، ونوصل للناس كلها أن الخير موجود دايما والناس للناس».
