كشفت الفنانة رحمة حسن عن تعرضها لهجوم من كلب أثناء سيرها في الشارع، وأن العضه فى منطقة حساسة من جسمها حسب ما كتبت،عبرحسابها على موقع الصور والفيديوهات انستجرام.
وكتبت:”إمبارح الساعة 11 بليل كنت نازله أجيب حاجه من السوبر ماركت، جمب البيت، وكنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد تقريبا مَش متأكدة أوي، بيهجم عليا بكل قوته”.
وأضافت: ” طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضه كبيره وغويطه بنابه في منطقة حساسة، صاحبة الكلب كتر خيرها أخذتني فوراً على مستشفي إمبابة، ادوني حقنه تطعيم الكلب ولسه فاضلي 4 هاخدهم خلال شهر بس المشكلة إن من إمبارح الجرح بينزف دم كتير”.
وتابعت رحمة:”أنا طبعا خايفة ومصدومة وتعبانة وعندي تروم من امبارح، والي واجعني أكتر اني مَش عارفه أتصرف ازاي، خصوصاً اني اكيد مَش عايزة الكلب يتأذى، بس كمان مَش عايزة أي انسان كمان يتأذي ويتعض ويتبهدل في الشارع زيي، أنا كنت بشوف الكلب ده دائماً مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه”.
وأكملت :”امبارح صاحبة الكلب قالتلي متخافيش هو عض ولادي قبل كدا وتمام محصلش حاجة! طبعا أنا اتصدمت لما عرفت إنها مَش أول مره الكلب، يعض حد ومع ذلك هي سايباه عادي في الشارع من غير كمامه أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسئولية كاملة عنه ويحاسب علي إهمال مسئوليته، خصوصا لو اهماله تسبب لشخص تاني في أذي بدني يحتاج أكتر من 21 يوم علاج وأذي نفسي ماعرفش هياخد قد ايه عشان يخف.
