تحدث الفنان سامح حسين، عن طفولته القاسية وقال باكيا كنت بشتغل في الفاعل أطلع رمل وطوب لحد ما ظهري وجعني ومازلت بعاني منه لغاية دلوقتي.
جاء ذلك خلال لقاء سامح حسين مع الإعلامي عمرو الليثي في برنامج “واحد من الناس”، المذاع عبر شاشة قناة الحياة وأكمل قائلا: كنت بشتغل فواعلي علشان أساعد أمي، وأنا لم أخجل من أى شيء بالعكس كان ربنا بيطبطب عليا دايمًا.
وأضاف: أصعب أيام حياتي كانت وقت وفاة والدتي، ومن بعدها وفاة أخويا الصغير غريق في الإسكندرية، ويعتبر أنا اللي ربيت إخواتي وبعتبرهم أولادي.
وأوضح سامح حسين أن أصعب الأيام التي مر بها في صغره، جعلته غاضبًا من والده بعدما تركهم بمفردهم في ظروف معيشة صعبة.
وأضاف: والدي ووالدتي كانوا منفصلين وكافحت مع والدتي علشان نربي إخواتي، وعشنا فترة صعبة أنا وأمي، وأمي كانت بتقول لقرايبي أنها مربية فراخ في المنور وعاوزه بواقي الأكل ليهم، وكانوا بيدوها بواقي الأكل وكنت أنا وإخواتي الفراخ اللي بناكل البواقي، وأنا بحترم جدًا كل اللي بيشتغل ويصرف على أهله.
وعلق سامح حسين قائلًا: كنت واخد على خاطري من والدي عشان سابنا أنا وأمي وإخواتي في الظروف الصعبة دي، لكن خلاص كل حاجة راحت وهو حاول يعتذر قبل وفاته لكن كان خلاص.
