تصدر الفنان محمد رياض التريند بعد عدد من التصريحات حول بدايته الفنية وحديثه عن احترف كرة القدم في بداياته، حيث كان يلعب ضمن صفوف نادي أبو سمبل، وتم قيده في الاتحاد المصري لكرة القدم، تحت سن 19 عاماً.
جاء ذلك خلال لقائه مع الإعلامية منى الشاذلي في برنامج “معكم منى الشاذلي” المذاع على قناة cbc.
واضح محمد رياض أنه اعتزل في سن مبكرة ولم يكمل مسيرته الرياضية بسبب إحدى المباريات، قائلا: “كنا نادي درجة تانية، تحت سن 17 سنة و19 سنة.. وقتها طلعنا دوري الدرجة الأولى وبنلاعب الأهلي والزمالك والفرق دي، وإحنا كنا فرقة بلا تمويل، مكنش فيه فلوس وكنا بنشتري الحاجات على حسابنا”.
أضاف محمد رياض: “كنا بنلاعب نادي اسمه نادي المية، كنت بلعب باك رايت، في الشوط الأول الكورة اترمت من ورايا وشايفها عدت من فوقي وبيني وبين لاعب الفريق التاني 5 أو 6 متر قلت هلف براحتي ده مش هيجيبني، في ثانية مشوفتوش، الواد صاروخ خد الكورة وجاب جون، أول جون جه بسببي”.
تابع: “عرفوا بقى إني مش عارف الحق الواد، فيرموا الكورة من ورايا والواد صاروخ، مش عارف أضربه ولا أوقفه ولا عارف أعمل حاجة، ده كان أسرع من محمد صلاح، والله ما كنت بشوفه، بيعدي بسرعة الصاروخ، مبلمحوش، كان خرافة.. خلصت الشوط الأول وطبعا غيرني المدرب، مكملتش الماتش دخلت أوضة اللبس وغيرت ورجعت البيت واعتزلت ومروحتش النادي تاني خالص”.
