بحفل خاص لتخرج قسم الجغرافيا بكلية الأداب بجامعة سوهاج، أقامه الطلاب عقب إنتهاء امتحانات الفصل الدراسى الثانى، داخل إحدى قاعات الإحتفال الخاصة وبعيد عن الحرم الجامعى، إحتفلت أسرة من محافظة البحر الأحمر بنجلتهم “نورا،م” الخريجة من القسم والتى تدرس بالقسم على طريقتهم الخاصة .
حيث أهدت الأسرة الفتاة روب وكاب للتخرج مصنوع من النقود فئة ال200 جنية وبوكية من الورد مما أثار ردود أفعال متفاوتة على وسائل التواصل الإجتماعى.
حيث ظهر بمقطع للفيديو للفيديو الفتاة وهى تحتفل مع أسرتها مرتدية النقود ويرقصوا على أنغام أغنية “مليونير” للفنان محمد رمضان، وتمسك بعدة نقود فئة ال200 جنية بيدها.
وكتبت نورا عادل عبر صفحتها الشخصية بموقع التواصل الاجتماعي ” انا مش عارفه ابدا منين وازاي بس بجد مكنتش متخيله اللي يحصل دا انا حد عادي خالص كنت فرحانه واهلي زيي فرحانين بيا مش اكتر ولا احداث نعمه ولا فشخره ولا انا هدفي كسر قلوب الغلابه واللي مش قادرين ولا انا ابويا مش كويس زي ما قولتوا ولا انا فلاحه برضو ولا انا اي حاجه خالص م اللي اتقال كل الفكره ان ابويا مبسوط بيا بعد ١٦سنه تعليم ودي طريقته اللي حب يعبر بيها عن فرحته +انا شغاله مع بابا م تالته ابتدائي لغايه دلوقتي ف دي حاجه مفرحاه مني جدا ف حب يعمل حاجه تفرحني.
واضافت نورا انا كمان بفلوسنا وتعبنا ولا احنا شحاتين ولا بيتنا مفهوش كبايه زي التانيه زي ما اغلبكم قال ولا احنا بنتباهي بحاجه زي دي والله ولا هو اثار برضو واللي خلي بابا يفرح اكتر اني جبت تقدير عالي ف مشروع تخرجي واني الوحيده اللي قدرت اناقش مع الدكاتره واخلي مشروعي حاجه الكل يتكلم عنها ف فخوره بنفسي وفخوره ب ابويا جدا لانه نور عيني ومش مسامحه اي حد جاب سيرتنا بالوحش حسبي الله ونعم الوكيل بجد ف اي حد اذاني نفسيا وهفرح واركز ف مستقبلي ولا هيهمني اي حاجه باذن الله .
واستكملت عادل: انا لا حابه اكون تريند ولا صحافه تكلمني ولا تستضيفني ولا اي حاجه م الكلام دا خالص انا ابسط من كدا والله العظيم بحمد ربنا ع تخرجي واني قدرت احقق جزء صغير م مجالي وبتمني اني اوصل بمجهودي مش بتريند ولا ب اي طريقه مترضينيش وتتعبني نفسيا ومش لازم اكون ف طب عشان والدي يفرح بيا.
واختتمت اخر حاجه احب اقولها بلاش تدخلوا ف حياه الناس محدش عالم الناس دي بتمر ب ايه وكسره القلوب صعبه اوي وربنا ولا سامحكم الله ولا عفا عنكم ياللي شتمتوني وهنتوني بجد انا خصيمه اي حد شتمني وقال ف حق اهلي كلمه وحشه وشكرا لكل اللي دافع عني واولهم صحابي ودفعتي وقرايبي ، دا مشروعي ف الكومنتات اتمني ينتشر بقي احسن م الحاجات اللي انتو بتتكلموا فيها ، اميتوا الباطل بالسكوت عليه ف دا اخر حاجه هقولها اني مش هتكلم تاني ، وبس كدا!
يذكر أن طلاب جامعة سوهاج ينظموا عدة حفلات خاصة للتخرج بدون إشراف جامعى، ولكن تنظمها شركات خاصة تجمع الطلاب وذويهم بإحتفال أشبه بالزفاف وذلك عقب إنتهاء الإمتحانات ويمكن أن يجمع الحفل أكثر من كلية معا.
