خرج الفنان تامر حسني عن صمته بعد أيام من حملة هجوم واسعة عبر مواقع التواصل الاجتماعي، وكشف تفاصيل حملته الإعلانية مع شركة شيبسي مؤكدا أنها شركة مصرية.
وقال تامر حسني عبر حسابه على فيسبوك: أنا مضيت على عقد مكتوب فيه أن شيبسي شركة مصرية و لها سجل تجاري ضريبي مصري منفصل والبند قدامكم اهوه لصدق كلامي.
وتابع: والأهم لأي حد بيشكك في انتمائي للقضية الفلسطينية هقوله أنا من 20 سنة وأنا في ضهر القضية ومش كلام وأغاني بس لاااااا …. أنا روحت بنفسي معبر رفح أثناء الضرب لمساندة أهالينا هناك بأكبر حملة معتقدش في حد هيخاطر بحياته و يروح بنفسه معبر رفح اثناء الضرب مجامله مثلاً …!!
واستكمل حديثه مؤكدا: أنا لما قررت اكون الوجه الاعلاني لشيبسي من سنتين لأنه منتج مصري كل المصريين بيحبوه والبطاطس من الفلاحة المصرية وبيتباع في مصر بس و اتربينا عليه والأهم أن الشخص البسيط يقدر يشتريه في ظل ظروفنا الاقتصادية وأظن ده واضح في الإعلان .. ده كان شعوري الشخصي اتجاه الحملة وأنا بمضيها من سنتين عشان كده كان واجب عليا التوضيح للجميع وللّي مش واصلاله الصورة بكل احترام.
واختتم حديثه بشكر كل من دافع عنه: شكراً لكل اللي ردوا عني وهما مغمضين حقيقي انتوا نعمة كبيرة من ربنا الف شكر و رمضان كريم على الجميع.
