كشف بيتر ميمي مخرج مسلسل الحشاشين، عن أحداث وتفاصيل جديدة عن المسلسل كما رد على الانتقادات التي أثيرت خلال الأيام الماضية بعد عرض المسلسل وكشف عدد من الحقائق حول حسن الصباح واستخدام اللهجة العامية المصرية.
وكتب مخرج مسلسل الحشاشين عبر حسابه على موقع فيسبوك: كل سنة وأنتم طيبين .. مع انى مكنتش حابب اتكلم علشان دول كلهم ٤ حلقات!
مسلسل الحشاشين من وحي التاريخ
مبدأيا المسلسل من وحي التاريخ و ده مكتوب نصا فى التترات يعنى مش وثيقة تاريخية لكنه دراما تاريخية .. هو تارنتينو لما قتل هتلر فى السينما كان حقيقة؟ او نابليون فى فيلم ريدلى سكوت الاخير هل ده نابليون اللى فى كتب التاريخ؟ ديه دراما تاريخية .. حاولنا نعمل خيال تصويرى لفترة من الفترات لكن فى شكل درامي.. لكن رجعنا فى الديكور و الملابس لمراجع كتيرة و نادرة علشان نعمل عالم مشوفنهوش قبل كده و ميكنش شبه افلام أو مسلسلات عالمية…
هل ده حسن الصباح؟ مفيش كتاب اتفق على حسن الصباح لان المغول حرقوا القلعة و كتبه و افكاره و المجهود اجتهاد… ماركو بولو او فلادمير بارتول او برنارد لويس او فرهاد دفترى… و كتير جدا.
معجزات حسن الصباح فى مسلسل الحشاشين
وعن معجزات حسن الصباح قال بيتر ميمي: حسن الصباح كان بيعمل معجزات؟ لا طبعا!!! و ده تباعاً مع الحلقات هيتفهم.
مسلسل الحشاشين تاريخي بالعامية المصرية.. الأحداث بيت أتراك وفرس .. لما عملوه الأتراك اتكلموا تركي و لما عملوه الامريكان بيتكلموا انجليزى .. احنا عاملينه فى مصر و الترجمة موجودة فى كل بلد.. المسلسل بيتعرض فى روسيا وأمريكا وأكتر من بلد كل بلد بلغتها..هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الأمريكية.
ليه حسن الصباح؟ حسن الصباح شخصية فذة وغريبة ومستفذة إنك تعرف عنها .. مش لازم يكون رمز للخير علشان يتعمله مسلسل.. هتلر وراسبوتين كانوا فى منتهى الشر لكنهم شخصيات فذة غيرت العالم .. أو على مستوانا المصرى خط الصعيد أو سفاح اسكندرية
بيتر ميمي يوضح حقائق عن الحشاشين
وأضاف بيتر ميمي عن مسلسل الحشاشين: في حاجات صغيرة لازم أوضحها وهي:
- أم الخليفة رصد كانت نوبية الاصل.
- اسكندرية مدينة فى مصر .. لأن فى مدن كتير باسم اسكندرية حوالين العالم .. لزم التوضيح للترجمة لأن فيه غير مصريين بيتفرجوا على المسلسل.
- مجاعة القاهرة الفاطمية مثبوتة تاريخيا لكن تعددت اشكالها حسب المصادر و هى على فكرة كانت قبل وصول حسن بفترة مش بعيدة بس ديه دراما (من وحي التاريخ)
- ماتسمى بمعجزات حسن الصباح مقصود تتصور بالشكل ده و ده هيبان تباعا و خصوصا مشهد الراوي حلقة ٨.
- عم ملك شاه اتقتل بوتر القوس لأن ده كان عرف وتقليد.
مين الست اللي بتظهر لحسن الصباح
وأجاب بيتر ميمي عن التساؤل حول شخصية السيدة التي تظهر لحسن الصباح حيث قال: مين الست اللى بتظهر لحسن الصباح؟ ده فى حلقة ٣٠ بقى لو ربنا ادانا عمر.
كل سنة وأنتم طيبين و سعيد ان المسلسل خلاكم تقروا و تسألوا .. وشوية شوية هتفهموا المسلسل .. صحصحوا معانا كده يا شباب خلونا نعمل شكل جديد .. وتبقى بداية ومع الوقت يتعمل أفضل وأكبر وأحسن من اللى أحنا عاملينه .. ومع الوقت ننافس …
