ظهر الفنان الشاب نور خالد النبوي نجل الفنان خالد النبوي، في الحلقة ٢٥ من مسلسل الاختيار٢، تجسيدا لدور البطل الشهيد ملازم اول أحمد حافظ شوشه أحد ابطال معركة الواحات في اكتوبر 2017.
ولاقى الفنان نور النبوي اعجاب الجميع ونال الكثير من التعليقات الايجابية والاحتفاء الكبير على دوره في المسلسل، بمواقع التواصل الاجتماعي.
ومن جانبه، قال الناقد الفني عبدالله غلوش، بصفحته على موقع “فيسبوك” اليوم السبت، “في رأيي نور ممثل مبشر بإذن الله يكون له مستقبل كبير، لكن في رأيي كمان ان عبارات المدح اللي كتبها البعض عنه كانت تحمل قدرا من المبالغة نوعا ما .. خاصة ان دوره او الخمس مشاهد اللي ظهر فيها مكنش فيهم اللي نقدر نحكم بشكل كبير على امكاناته وقدراته التمثيلية.
– الحقيقة معرفش اللي حصل ده بسبب تأثر الناس بحلقة مأمورية الواحات وبالشخصية اللي كان بيجسدها نور وبالجملة المؤثرة اللي قالها قبل استشهاده، ولا اللي حصل ده بسبب ان اسمه نور خالد النبوي ووالده له رصيد كبير من المحبة والاحترام عند ناس كتير وحط تحت الاحترام دي كذا خط، معنى كده ان الناس معندهاش مشكلة مع فكرة توريث الفن او الواسطة او ابناء وأسر العاملين، طالما انهم موهوبين ويستاهلوا فعلا، والأهم من كده انهم ميحسوش انهم مفروضين عليهم.
نور مظهرش السنة دي في مسلسل بطولة والده، ولا والده قال يا إما نوريكون موجود أو انا مش عامل المسلسل.
– نور لأنه وجه جديد طالع في خمس مشاهد، الدور الطبيعي لممثل في بداياته، لا اشترط انه يكون دور محوري ولا انه يظهر في كل حلقة ولا ان باقي الابطال تتكلم عنه في الحلقات اللي مش هايظهر فيها.- نور مشوفتش والده طالع عمال على بطال يتكلم عن موهبته وامكاناته الفنية الخارقة، مجرد فرحة أب عادي بإبنه وسايب الناس هي اللي تقيمه وتحكم عليه.
– مسألة ان نور يكمل ولا لأ، دي حاجة بتاعة ربنا، لها علاقة بموهبته ودماغه واتزانه نفسي والطريق اللي هيختاره لنفسه واجادته للأدوار اللي هايقدمها .. ممكن في يوم نشوفه زي نجم رمضان الاول السنة دي كريم ابن المخرج محمد عبدالعزيز، وممكن لا قدر الله نلاقيه زي ولاد فنانين كتير قاعدين في البيت او بيعملوا ادوار اي كلام، عشان ابتدوا غلط واهلهم فرضوهم علينا ومعرفوش يشتغلوا على نفسهم صح”.
