تحدثت النجمة شيرين عبد الوهاب، عن قصة طلاقها من الفنان حسام حبيب.
وقالت شيرين، ببرنامج “كلمة أخيرة” : “اطلقنا طلاق بائن لما قصيت شعري.. بعد ما هديت من الكارثة اللي حصلت حسيت إني مش قادرة أستغنى عنه وإني أديله فرصة تانية وكل اتنين مع بعض لما بيسيبوا بعض بيكون فيه فجر في الخصومة.. علاقة الزواج مقدسة لازم نحافظ عليها”.
وتابعت: “أنا كنت بحبه وفاكراه ابني مش بس زوجي، اهتميت بيه وعملت استوديو علشان شغلنا يتعمل فيه، واشتريت له كل الأغاني اللي عجبته بشيكات باسمي علشان أضمن له الأغاني دي متروحش منه”.
واستكملت: “لقيت بعد كده إنسان بيتهمني إني بقيت شبه أمه وإنه عاوز واحدة يتباهي بيها قدام الناس تبقى حلوة ورفيعة وكده، وكان فيه خناقات بالضرب والسحل على الأرض وشتيمة عمر ما فيه إنسانة تقبلها على نفسها”.
وأوضحت: “بعد طلاقنا قلت أديله فرصة تانية بس بشروط وهو وجود بيت غير بيتي وحياتنا تبقى لوحدنا ويشتغل.. أنا عندي بيت كبير وكان بيجي يزورنا كتير قبل الزواج”.
وتابعت:”كان بيتردد على البيت علشان كان فيه بيننا شغل في الاستوديو في البيت، وكنت بحاول أعمل تمهيد للبنات إنه مخرجش من حياتنا وإنه لسه بيخلي باله مننا لغاية ما بدأت الوعود تختفي وتتلاشى”.
وأضافت: “المشاكل رجعت تاني وقلة الأدب رجعت تاني بدون سبب.. أنا لما بتعصب ممكن أسبب أذى لنفسي .. وطبيبي الدكتور محمود مرسي نصحه إن في اللحظة دي إما يسيبني ربع ساعة أو أدخل الأوضة لغاية ما أهدى،كانت في كل خناقة يفضل قدامي يحرق في دمي وأعصابي لغاية ما أسمك الماكينة وأحلق شعري”.
