تصدرت الفنانة شيرين رضا الترند فى الساعات الأخيرة بعدد من التصريحات عن الزواج والصداقة بين الرجل والمرأة كما تحدثت عن الخيانة.
وقالت شيرين رضا خلال لقائها فى برنامج “abtalks” الذي يقدمه الإعلامي أنس بوخش: “الجواز مزيف لأن الزوج لازم يكون صديقك المقرب وتشاركه كل شيء وتفكر معاه ولكن الناس مش بتعمل كدا وبيكملوا في العلاقات دي من أجل الماديات ومش بنصح بالجواز دلوقتي، والجيل الجديد مش هيتجوز لأنهم شايفين اللي بيحصل”.
شيرين رضا الصداقة أقيم من الزواج
تحدثت شيرين رضا عن أنها تؤمن بالصداقة بين الرجل والمرأة مشيرة أن علاقة الصداقة أقيم من الزواج.
وأضافت:” أنا محظوظة لأني جربت الصداقة اللي من النوع دا وعندي صديق مقرب مني من أيام الطفولة ولسة أصحاب وإحنا مشكلتنا إننا بنبص على الجنس دا راجل ولا ست مش إن الشخص هو إنسان في النهاية، وصعب الناس الكبار في الوطن العربي يفهموا دا.. وبالنسبالي العلاقة دي أقيم من الزواج اللي غالبا بينتهي بالطلاق أو الانفصال”.
وأوضحت شيرين رضا أن خطوة الزواج تحتاج إلى تفكير عميق من الطرفين وتحديد الهدف من تلك العلاقة وعن الأشياء التي يريدها من تلك العلاقة بعيدا عن الماديات ولابد أن تدوم.
شيرين رضا.. الخيانة متوقعة
أيضا تحدثت شيرين رضا عن الخيانة وقالت:”إن خيانة الرجل متوقعة دائما هي حاجة عادية شوفناها كتير في المسلسلات وبتحصل حوالينا، وإحنا اللي عودنا الراجل على كدا علشان الست لما بتخلف بنت وولد بتتعامل معاهم بطريقة مختلفة أننا بندي للولد حقوق عشان هو راجل فبيكبر على الحقوق دي”
وعن شخصيتها قالت: “بعتبر نفسي لسة بنت صغيرة مش ست كبيرة.. شايفة نفسي واحدة عندها 28 سنة، ولما أوصل 30 سنة هكون بلغت.. لكن أنا لسة لحد دلوقتي مبلغتش، وعلى فكرة مش بحاول أصغر نفسي وأتصرف كطفلة، أنا فتاة بحاول أكتشف تجارب كتيرة ومازلت”.
وتحدثت شيرين رضا عن معاناة المرأة الجميلة حيث قالت:«الجمال له ثمن ولازم تدفعه مينفعش تعيش عليه، علشان تلاقي حياة أفضل تقدر تعيش لأنه ممكن يضيع في لحظة».
شيرين رضا.. مش عايزة جنازة
وكشفت شيرين رضا، تفاصيل الأيام الاخيرة فى حياة والدها الفنان محمود رضا وكيف تجاوزت رحيله قائلة: والدي كان 65 سنة وكان بيلعب أسكواش وبيجري وبيطلع السلالم، ومرة راح للدكتور وقاله بلاش رياضة أنت كبرت، وساعتها تعب وفضل في السرير، وأنا كنت بتمنى أنه يمشي تاني وميحسش أنه قاعد مش قادر ياكل ولا يشرب وكنت سعيدة لما مات لأنه أرتاح ومتعذبش أكتر، وأكيد بيوحشني ولكني بحتفل بـ كل لحظة عشتها معاه، وبتمنى لما أموت الناس تحتفل بحياتي ويشغلوا مزيكا ويرقصوا ومش عايزة عزاء وعايزة حفلة.
