قالت الاعلامية سهير جودة، إن الكراش هو مصطلح جديد منتشر بين الشباب، وهو يعني الاعجاب بشخص سري أو غامض، قائلة: «المفروض انه شخص مش معروف للاخرين او انا مبعرفوش للاخرين، وده المعنى الدقيق للكلمة، ولكن الترجمة الفعلية للاجيال الجديدة، انهم بيراقبوا الشخص وهو بياخد باله، وبتعمله لايك وفولو وهو بياخد باله، بيبقى الطرف التاني عارف ان الطرف الاول بيفكر فيه».
وأضافت سهير في برنامجها الذي يحمل اسم «الستات» والمذاع عبر فضائية «النهار»، قائلة: «ان الكراش هو الامتداد الطبيعي لفكرة الحب من طرف واحد، وهي ترجمته كراش، ومين فينا مكانش كراش على النجوم، او الاعجاب بشخص، فهو بقى خب من طرف واحد وده للمراهقين، لأن فيه حب للكبار من طرف واحد بشكل ناضج».
وأشارت: «وفي الجيل بتاعنا كان مستوى الكراش هما النجوم، زي احمد زكي واحمد مظهر، مرورا بالجيل الجديد زي احمد عز وكريم عبدالعزيز، لحد لما كنا بنحب حد نعرفه اسمه حب من طرف واحد، لان هو مبيبقاش حب، وبالمناسبة الجيل ده بيتعامل مع الاعجاب بشكل بسيط عن تعامل الجيل بتاعنا تماما».
وتابعت سهير: «الاول انا كنت بشوف ان الحب من الطرف واحد في فترة المراقة غير حقيقي وغير ناضج، لكنه كان اقوى واعمق، والسوشيال ميديا سهلت التواصل، لكن زمان لما واخدة تعجب بواحد تقعد تستنى هتشوفه تاني امتى، ده من التفاصيل اللي كلن فيها عمق للحب، لكن دلوقتي مفيش اي عمق خالص».
وأوضحت: «لفظ الكراش بيتكرر كتير بالعدوى، والحياة اختلفت وبقت اسهل لكن مش اعمق ، فبقت المشاعر كلها سطحية، يعني فكرة ان كل حاجة بقت سطحية مبقتش في حاجة عميقة، وفي ناس تحت السطح بيكونوا أنضج واكبر وممكن يحصلهم الحب من طرف واحد، احيانا بنقابل الشخص الصح في الوقت الغلط والظرف الغلط، واحيانا بنقابل الشخص الغلط في الوقت الصح والظرف الصح، والناس اللي بتقع في الشخص الغلط بيبقوا لسة موصلوش لمرحلة النضج».
وأكدت سهير: «الحب من طرف واحد بيبقى فيه تراكمات ومواقف وتبقي فاهمة نفسك والشخص اللي قدامك، وفي الاغلب بيبقى في تعامل بينهم، في ناس بيبقى عندها من النضج والاتزان ان ده بيعملها سعادة لما تحب من طرف واحد لأنها مبتبقاش منتظرة الجواز وبتبقي متفهمة الظرف اللي انتي فيه والظرف اللي فيه الطرف التاني».
